IIV Akademiyasi boshligʻi Ichki ishlar vazirligining Navoiy viloyatidagi akademik litseyi yoshlari bilan uchrashdi
2025-02-14 10:00:00 / Yangiliklar
Akademik litseyda oʻtgan uchrashuv oldidan Rustam Xatamov taʼlim-tarbiya jarayonlari, oʻquvchilarni kasbga yoʻnaltirish, ularning vatanparvarlik ruhini yuksaltirish, tizim uchun munosib kadrlar etib tayyorlash borasida amalga oshirilayotgan ishlar bilan yaqindan tanishdi.
Shundan soʻng yoshlar bilan ochiq muloqot tashkil qilindi. Akademiya boshligʻi mamlakatimiz hayotida roʻy berayotgan ulkan oʻzgarishlar, muhtaram Prezidentimiz boshchiligida amalga oshirilayotgan keng qamrovli islohotlar, yurtimiz yoshlari uchun yaratilayotgan keng imkoniyatlarga toʻxtaldi.
Bugungi murakkab davrda yoshlar taʼlim-tarbiyasi eng muhim vazifa ekanligini taʼkidlab, oʻquvchilarni zamonaviy bilimlarni puxta egallashga, tanlagan kasbining yetuk mutaxassisi boʻlishga, mamlakatimiz hayotiga daxldorlik hissi bilan yashashga chaqirdi.
Uchrashuvda yoshlar maʼnaviyatiga salbiy taʼsir koʻrsatayotgan illatlar, internet orqali kirib kelayotgan tahdid va xatarlar, yoshlar tomonidan sodir qilinayotgan jinoyatlarga ham eʼtibor qaratildi.
Akademiya boshligʻi davlatimiz rahbarining mahallalarda xavfsiz muhit yaratish va huquqbuzarliklarning barvaqt oldini olish toʻgʻrisidagi qarorining dolzarb ahamiyatiga toʻxtaldi.
Mazkur qaror bilan hududlarda yangi tizim joriy qilinayotgani, aholi, ayniqsa yoshlar oʻrtasida jinoyatchilikka barham berish ustuvor vazifa ekanligi qayd etildi.
Samimiy ruhda oʻtgan tadbir soʻnggida taʼlim-tarbiya ishlarini yanada jonlantirish, oʻquvchilarning kasbga sadoqatini oshirish, ular qalbida yurt kelajagi uchun daxldorlik hissini yuksaltirish, ularni buyuk ajdodlarimizga munosib vorislik ruhida tarbiyalash yuzasidan tavsiyalar berildi.
Shuningdek, bir guruh fidoyi oʻqituvchi-murabbiylar hamda tengdoshlariga namuna boʻlayotgan oʻquvchilar IIV akademiyasi nomidan tashakkurnoma bilan taqdirlandi.
IIV Akademiyasi Axborot xizmati