Alisher Navoiy tavalludi munosabati bilan maʼnaviy-maʼrifiy tadbir oʻtkazildi
2025-02-09 17:05:00 / Yangiliklar
9-fevral – Buyuk shoir va mutafakkir Alisher Navoiy tavallud topgan kun munosabati bilan yurtimizda keng miqyosli tadbirlar tashkil etilib, uning boy ilmiy va ijodiy merosi yodga olinadi. Shu munosabat bilan Ichki ishlar vazirligi xodimlari ishtirokida poytaxtimizdagi Adiblar xiyobonida joylashgan Alisher Navoiy haykali poyida maʼnaviy-maʼrifiy tadbir boʻlib oʻtdi.
Tadbirda soʻz olganlar Alisher Navoiyning oʻzbek adabiyoti va madaniyati taraqqiyotiga qoʻshgan ulkan hissasi, uning asarlari xalq maʼnaviyatini yuksaltirishda tutgan oʻrni haqida fikr bildirishdi. Shuningdek, shoirning maʼrifatparvarlik gʻoyalari va asarlaridagi ezgu gʻoyalar bugungi kun uchun ham muhim ahamiyat kasb etishi taʼkidlandi.
Tadbir yakunida Ichki ishlar vazirligi xodimlari va tadbir qatnashchilari buyuk shoir xotirasiga hurmat bajo keltirib, haykal poyiga gulchambar qoʻydilar. Bu ezgu anʼana Alisher Navoiy merosiga boʻlgan chuqur ehtirom va unga munosib avlod boʻlishga intilishning ramzi hisoblanadi.
Mazkur tadbir Navoiy asarlarini yanada keng targʻib etish, yosh avlodni uning maʼnaviy merosidan bahramand etish va milliy oʻzlikni anglashga xizmat qiladi.
IIV Maʼnaviy-maʼrifiy ishlar va kadrlar bilan taʼminlash departamenti