O‘zbеkiston Rеspublikаsi Ichki ishlаr vаzirligi

Tadbirda viloyat hokimi Ulugʻbek Qosimov, barcha tuman va shahar sektorlari rahbarlari, Ichki ishlar vazirligining sohaviy xizmatlari mutasaddilari, Milliy gvardiya, Favqulodda vaziyatlar boshqarmasi, huquq-tartibot organlari va harbiy tashkilotlarning rahbarlari, hamkor tashkilotlar shuningdek, mahallalarning yettilik guruhlari ishtirok etdilar.

Taʼkidlanishicha, respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish bugungi kunda dolzarb masala boʻlib qolmoqda. Davlat rahbarining qarorida aynan joriy yilda amalga oshirilishi lozim boʻlgan aniq vazifalar belgilangan boʻlib, ularning ijrosini taʼminlash qatʼiy nazorati belgilangan.

Jumladan, qaror talablaridan kelib chiqqan holda hozirda, respublika darajasida idoralararo muvofiqlashtiruvchi ishchi guruhi va uning Surxondaryo viloyati boʻyicha tarkibi tashkil etilgan boʻlib, huquqbuzarliklar profilaktikasi boʻyicha har bir tuman va shahar kesimida bajariladigan ishlarning hajmi aniqlangan. Viloyat boʻyicha mavjud 724 ta mahallaga oid “Yoʻl xaritalari” tasdiqlangan hamda viloyat hududidagi 95 ta “qizil” toifada qolayotgan barcha mahallalarga masʼul sektor rahbarlari nomma-nom biriktirilgan.

Qaror talablaridan kelib chiqqan holda amalga oshirilgan ishlar natijasi har oy yakunida Ichki ishlar vaziri, har chorak yakunida Bosh prokuror va har yarim yilda Bosh vazir huzurida muhokama qilinishi belgilandi.

Ishchi guruh tashrifi davomida “Raqamli xavfsiz mahalla” konsepsiyasi namunasini yaratish maqsadida Termiz shahridagi “Alpomish” mahallasida “Xavfsiz shahar” markazi tomonidan oʻrganish oʻtkazilib, hududga kirish-chiqish joylariga, avtobus bekatlari va maktablar oldida qoʻshimcha ravishda 20 ta yuzni tanib oluvchi, 3 ta aylanma va 3 ta avtomobil davlat raqamlarini aniqlovchi intellektual kameralar oʻrnatildi hamda profilaktika inspektori xizmat xonasiga va “Xavfsiz shahar” platformasiga integratsiya qilindi.

Surxondaryo viloyati mahallalarida kriminogen vaziyatni barqarorlashtirish hamda yangicha yondashuvlar asosida huquqbuzarliklarning barvaqt oldini olish tizimini tashkil etish boʻyicha, masalan Termiz tumanida “Xavfsiz va raqamli mahalla”, Termiz shahri va Sariosiyo tumanida “Namunali xavfsiz koʻcha”, Denov va Sherobod tumanlarida “Xavfsiz bola” va “Probatsiya va profilaktik hisobdagi shaxslarni sogʻlom turmush tarziga qaytarish”, Angor tumanida “Xavfsiz bozor”, Denov tumanida “Xavfsiz bekat”, Termiz va Jarqoʻrgʻon tumanlarida “Xotin-qizlar orasida jinoyatchilikning barvaqt oldini olish” namunalarini yaratish vazifasi topshirildi.

Ichki ishlar vazirligi tomonidan profilaktika kichik inspektorlari, migratsion profilaktika boʻlinmalari, maʼmuriy amaliyot guruhlari va profilaktika bosh inspektorlari lavozimlarini joriy qilish hamda tegishli shtat birliklarini shakllantirish vazifasi topshirildi. Bu jarayondagi ishni tashkil etishda Qumqoʻrgʻon tumani “Yangishahar” mahallasida barpo etilishi rejalashtirilgan “Huquq-tartibot maskani” loyihasi namunasidan foydalanish topshirildi.

Yigʻilish davomida masʼul shaxslarning axborotlari tinglandi, takliflar koʻrib chiqildi va aniqlangan kamchiliklarni bartaraf etish boʻyicha chora-tadbirlar belgilab olindi.