Tadbir jarayonida Denov tumanidagi kriminogen vaziyati ogʻir hisoblangan “Buyuk kelajak” mahallasida ishchi guruhga tuman sektor rahbarlari, mahalla yettiligi hamda mutasaddi tashkilot vakillari ishtirokida “Namunali xavfsiz yoʻlak”, “Huquq-tartibot maskani” barpo etish, “Xavfsiz bekat” namunasini ishga tushirish hamda “Yoshlar orasida jinoyatchilikning barvaqt oldini olish” borasida bajarilishi hamda Denov tadbirkorlik va pedagogika instituti mutaxassislari tomonidan “Xavfsiz talaba va aholi xavfsizligi” yangi yaratilgan platformalari orqali rejalashtirilgan ishlarning taqdimoti qilindi.

Taʼkidlanishicha, qaror ijrosini taʼminlash maqsadida, tuman hududida joriy yilning birinchi choragi davomida 383 ta hovli va koʻp qavatli uylarning xonadonlari va 30 ta savdo shoxobchalarini Milliy gvardiya qoʻriqloviga olish, 20 ta koʻp qavatli uylarning kirish eshiklariga domofonlar, mahallalarning asosiy kirish-chiqish joylariga 76 ta yuzni va avtoraqamlarni tanib oluvchi kameralar oʻrnatish belgilangan.

Tadbirda belgilangan vazifalar asosida mahallalarni xavfsiz hududga aylantirish masalalari ijrosi yuzasidan masʼullarning axboroti tinglanib, aniqlangan kamchiliklarni bartaraf etish yuzasidan tegishli topshiriq va koʻrsatmalar berildi.

Oʻrganish natijalariga koʻra, tumandagi 15 ta “qizil” toifadagi mahallalarda xizmat olib borayotgan profilaktika inspektorlariga xizmatda foydalanishlari uchun zamonaviy elektroskuterlar respublika ishchi guruhi hamda tuman xokimi tomonidan tantanali ravishda topshirildi.

Denov tumanidagi oʻrganishlar “qizil” toifadagi “Vodiy” mahallasida ham davom ettirilib, u yerda “Probatsiya va profilaktik hisobdagi shaxslarni sogʻlom turmush tarziga qaytarish” namunasini yaratish boʻyicha taqdimot bilan tanishildi, mahalla yettiligining jinoyatlarni barvaqt oldini olish boʻyicha amalga oshirilayotgan ishlari oʻrganildi.

Tadbir davomida Qizil suv daryosi boʻyida “Yoshlar sayilgohi“ qurilishi loyihasi bilan tanishish asnosida, u yerda yoshlarning boʻsh vaqtlarini mazmunli oʻtkazishlari, hunarmandlar uchun sharoitlar hamda yoshlarga ish oʻrinlari yaratilishi boʻyicha taqdimot bilan tanishildi.

Ishchi guruhning oʻrganishlari Shoʻrchi tumanida davom etdi. Tumandagi “qizil” toifadagi “Navroʻz” mahallasi hududidagi “Charogʻon” istirohat bogʻida tuman sektor rahbarlari, hamkor tashkilotlar hamda mahalla yettiligi bilan uchrashuv tashkil etilib, qaror talablari batafsil tushuntirildi.

Hududda “Yoshlar orasida jinoyatchilikning barvaqt oldini olish” hamda “Ichkilikka ruju qoʻygan, giyohvand, ruhiy kasallar va boshqa ijtimoiy koʻmakka muhtoj shaxslarga manzilli tibbiy xizmat koʻrsatish” namunasini yaratish boʻyicha yangicha ish tizimi taqdimoti oʻtkazildi. Taqdimot yakunida 5 ta “qizil” toifadagi mahallalarga xizmatda foydalanishlari uchun kompyuter jamlanmalari topshirildi.

Oʻrganishlar davomida ishchi guruh tomonidan Qumqoʻrgʻon tumani “Yangishahar” mahallasi hududida joriy yilning birinchi choragida qurib bitkazilishi rejalashtirilgan yangi mahalla huquq-tartibot maskani loyihasi hamda tumandagi kriminogen vaziyati ogʻir hisoblangan 7 ta mahallalarida xavfsiz hudud yaratish ishlarining taqdimoti oʻtkazildi.

Unda joriy yilning birinchi choragi davomida, mahallalarni jinoyatdan holi hududlarga aylantirish yuzasidan istiqboldagi vazifalar haqida soʻz bordi.

Respublika ishchi guruhi tomonidan Surxondaryo viloyatidagi barcha mahallalarda huquqbuzarliklarni barvaqt oldini olish borasidagi ishlar oʻrganilib, kriminogen vaziyatni yaxshilashga qaratilgan aniq manzilli chora-tadbirlar belgilanmoqda.