Surxondaryoda xavfsiz muhitni yaratish va jinoyatchilikning oldini olish choralari kuchaytirilmoqda
2025-02-05 14:00:00 / Yangiliklar
Qaror talablarini amaliyotga tatbiq etish jarayoni Termiz shahrida oʻrganildi. Viloyat va shahar sektorlar rahbarlari, mutasaddi idoralar mas'ullari hamda mahalla yettiligi ishtirokida kriminogen vaziyati ogʻir hisoblangan “Bogʻishamol” mahallasida yangi ishga tushirilgan “Huquq tartibot maskani” faoliyati bilan tanishildi.
Mahallada xavfsiz muhit yaratish boʻyicha joriy yilning birinchi choragida amalga oshirilishi rejalashtirilgan tadbirlar taqdimoti oʻtkazildi. Taʼkidlanishicha hududda mavjud 107 ta koʻp qavatli uylarning yoʻlaklarida 58 ta domofon va 32 dona tashvish tugmalari oʻrnatilishi, 38 ta xonadonlar Milliy gvardiya qoʻriqloviga olinishi, 10 ta yirik savdo markazlari 68 ta videokameralar bilan jihozlanishi, shuningdek Islom Karimov koʻchasini “Namunaviy xavfsiz koʻcha” sifatida tayyorlanishi rejalashtirilgan.
Tadbir davomida ishchi guruh tomonidan Termiz shahrining sektor rahbarlari, “qizil” toifada qolayotgan “Tuproqqoʻrgʻon”, “Boʻston, “Farxod”, “Manguzar” hamda “Alpomish” mahallalari yettiliklari hamda hamkor tashkilotlar rahbarlari bilan uchrashuv oʻtkazilib, qaror talablaridan kelib chiqqan holda mahalla mutasaddilarining aniq vazifalari belgilab berildi.
Jarayonda huquqbuzarliklarning barvaqt oldini olish tizimining samaradorligini oshirishda Termiz shahri boʻyicha manzilli chora-tadbirlar dasturi tanishtirildi. Shunga koʻra, joriy yilning birinchi choragida shaharning kriminogen vaziyati ogʻir hududlarida 132 ta kuzatuv kameralari, 14 ta yuz va avtoraqamlarni tanib oluvchi kameralar oʻrnatilishi 49 savdo obyektlari hamda 822 ta xonadon qoʻriqlovga olinishi, shuningdek koʻp qavatli uylarda 315 ta namunali xavfsiz yoʻlaklar tashkil etilishi rejalashtirilgani bayon qilindi.
Tadbir davomida Termiz shahrida joylashgan IT-park faoliyati hamda Ichki ishlar vazirligi Kiberxavfsizlik markazi tomonidan tayyorlangan “Ye- nazorat” va “E-davomat” ilovalarining taqdimoti oʻtkazildi.
Surxondaryo viloyatida respublika ishchi guruh aʼzolari tomonidan mahallalarda kriminogen vaziyatni jilovlash, huquqbuzarliklar va jinoyatlarni erta aniqlab oldini olish ishlarini rejalashtirish hamda qaror ijrosini taʼminlash maqsadida huquqni muhofaza qiluvchi organlar hamda mutasaddi idoralar, keng jamoatchilik vakillari, nuroniylarni jalb etgan holda tuman va shaharlar miqyosida oʻrganish ishlari davom ettirmoqda.