IIV Akademiyasi rahbari Rustam Xatamov davlatimiz rahbarining qarori asosida amalga oshirilayotgan keng qamrovli ishlar bilan tanishish maqsadida Xorazm viloyatida boʻldi
2025-02-04 08:30:00 / Yangiliklar
Davlatimiz rahbarining mahallalarda xavfsiz muhitni yaratish va huquqbuzarliklarning barvaqt oldini olish tizimi samaradorligini oshirish borasidagi qarori hududlarga izchil tatbiq qilinmoqda.
Joylardagi uchrashuvlarda mahallalarning kriminogen vaziyatiga salbiy taʼsir koʻrsatayotgan omillar atroflicha muhokama qilindi.
Davlatimiz rahbari qaroridan kelib chiqadigan muhim vazifalar, amaliyotga joriy qilinayotgan yangicha mexanizmlar tushuntirib oʻtildi.
Aytish joizki, shu kunlarda akademiya professor-oʻqituvchilari tomonidan viloyatning “qizil”, “sariq” toifadagi mahallalarida oʻrganishlar olib borilmoqda.
Ilmiy-amaliy yondashuvlar asosida kriminogen vaziyatni yaxshilashga qaratilgan chora-tadbirlar ishlab chiqilmoqda.
Hududlarni oʻrganish jarayonida akademiya boshligʻi ayni yoʻnalishda bajarilayotgan ishlar bilan ham tanishdi.
Ishchi guruh aʼzolari va masʼullar bilan muloqot qilib, huquqbuzarliklarning barvaqt oldini olish va jinoyatchilikni jilovlashda “mahalla yettiligi”ga metodik yordam koʻrsatish, birgalikda tizim samaradorligini yanada oshirish yuzasidan tavsiyalar berdi.
Bu boradagi ishlarni jonlantirish maqsadida mahalla faollariga IIV akademiyasi professor-oʻqituvchilari tomonidan tayyorlangan “Mahallada kriminogen vaziyatni baholashning yangi tizimi” va “Kriminogen vaziyati ogʻir mahallalar bilan yangicha ishlash mexanizmlari” nomli metodik qoʻllanma hamda materiallar tarqatildi.
Bir soʻz bilan aytganda, Prezidentimiz qarori asosida bugun hududlarga yangicha tajriba kirib bormoqda. Kriminogen vaziyat bilan bogʻliq muammolar esa joyida, qoʻyi boʻgʻinning oʻzida hal qilinmoqda. Bu ham jinoyatchilikni barvaqt jilovlashga xizmat qiladi.
IIV Akademiyasi Axborot xizmati