IIV Yoʻl harakati xavfsizligi xizmati rahbari Andijonda oʻrganish ishlarini olib bormoqda
2025-02-01 11:45:00 / Yangiliklar
Oʻzbekiston Respublikasi Ichki ishlar vazirligi Jamoat xavfsizligi departamenti Yoʻl harakati xavfsizligi xizmati rahbari, polkovnik Sherzod Ibragimov Andijon viloyatida oʻrganish ishlarini olib bormoqda.
Tashrif davomida Oltinkoʻl tumanidagi Baxt aylanma avtomobil yoʻlida yoʻl-transport hodisalarining oldini olish boʻyicha choralar koʻrib chiqildi. Transport vositalarining harakatlanish oqimi ortishi natijasida yuzaga kelishi mumkin boʻlgan xavflarni kamaytirish maqsadida, Andijon viloyati avtomobil yoʻllari bosh boshqarmasi nazorati ostida tartibga solingan chorrahaga oʻtkazish ishlari boʻyicha taklifiy loyiha muhokama qilindi. Shuningdek, Andijon shahridagi 57 ta chorrahada “Telecom Soft” kompaniyasi tomonidan oʻrnatilgan yangi aqlli svetoforlarning ishlash tartibi va ularning afzalliklari haqida mutaxassislar batafsil maʼlumot berishdi.
Shuningdek, Sherzod Ibragimov quyidagi obyektlarda olib borilayotgan ishlar bilan ham tanishdi:
- Andijon shahridagi A.Temur koʻchasida piyodalar harakatini cheklash uchun oʻrnatilayotgan temir panjaralar;
- “Yashil yoʻlak” loyihasi asosida A.Temur koʻchasida amalga oshirilgan ishlar;
- Andijon viloyati IIB JXX YHXB xodimlari tomonidan 2024-yilda amalga oshirilgan ishlar va oldinga qoʻyilgan rejalar;
- “Multi Business Company” MCHJ tomonidan tashkil etilgan yoʻl elementlarining koʻrgazmali taqdimoti;
- A-373 xalqaro avtomobil yoʻlining Xoʻjaobod tumani orqali oʻtgan 346-kilometrida qoidabuzarliklarni aniqlovchi maxsus uskunalar bilan jihozlangan avtobus faoliyati;
- Buloqboshi tumani markazida yoʻl infratuzilmasini yaxshilash boʻyicha amalga oshirilayotgan ishlar bilan tanishib, YHXX rahbari oʻz takliflarini berdi.
Bu oʻrganish ishlari viloyatda yoʻl harakati xavfsizligini oshirish va infratuzilmani yaxshilashga qaratilgan chora-tadbirlarni samarali tashkil etishga xizmat qiladi.
IIV Yoʻl harakati xavfsizligi xizmati Axborot xizmati