Ichki ishlar vaziri general-leytenant Poʻlat Bobojonov tomonidan Samarqand viloyatida hisobot yigʻilishi oʻtkazildi
2025-01-31 12:00:00 / Yangiliklar
Tadbir videoselektor formatida oʻtkazilib, unda viloyat hokimi vazifasini bajaruvchi Adiz Boboyev, barcha tuman va shahar sektorlari rahbarlari, Ichki ishlar vazirligining sohaviy xizmatlari mutasaddilari, Milliy gvardiya, huquq-tartibot organlari va harbiy tashkilotlarning rahbarlari, shuningdek, mahallalarning yettilik guruhlari ishtirok etdilar.
Yigʻilishda taʼkidlandiki, mahallalarda xavfsiz muhit yaratish va jinoyatlarning oldini olish boʻyicha ishlarni zamonaviy talablarga moslashtirish muhim vazifa boʻlib qolmoqda.
Davlat rahbari tomonidan imzolangan qaror talablaridan kelib chiqqan holda xozirda, respublika darajasida idoralararo muvofiqlashtiruvchi ishchi guruhi va uning Samarqand viloyati boʻyicha tarkibi tashkil etilgan boʻlib, huquqbuzarliklar profilaktikasi boʻyicha har bir tuman va shahar boʻyicha bajariladigan ishlarning xajmi aniqlanib, viloyat boʻyicha 1126 ta mahallaga oid “Yoʻl xaritalari” tasdiqlangan, shuningdek viloyat xududidagi 156 ta “qizil” toifaga tushgan barcha mahallalarga masʼul sektor rahbarlari nomma-nom biriktirilgan. Ushbu mahallalardagi ishlar natijasi har oy yakunida Ichki ishlar vaziri, har chorak yakunida Bosh prokuror va har yarim yilda Bosh vazir huzurida muhokama qilinadi.
Samarqand viloyati mahallalarida kriminogen vaziyatni barqarorlashtirish hamda yangicha yondashuvlar asosida huquqbuzarliklarning barvaqt oldini olish tizimini tashkil etish boʻyicha, masalan Urgut tumanida “Xavfsiz va raqamli mahalla” namunasini, Toyloq va Pastargʻom tumanlarida “Namunali xavfsiz koʻcha”ni, Bulungʻur tumanida “Xavfsiz bozor”, Samarqand shahrida “Xavfsiz bekat”, Oqdaryo tumanida “Xotin-qizlar orasida jinoyatchilikning barvaqt oldini olish” namunalarini yaratish vazifasi topshirildi.
Ichki ishlar vazirligi tomonidan profilaktika kichik inspektorlari, migratsion profilaktika boʻlinmalari, maʼmuriy amaliyot guruhlari va profilaktika bosh inspektorlari lavozimlarini joriy qilish hamda tegishli shtat birliklarini shakllantirish vazifasi topshirildi. Bu jarayondagi ishni tashkil etishda Samarqand shahridagi “Bogʻisaroy” mahallasida yangi ishga tushirilgan “Huquq-tartibot maskani” namunasidan foydalanish topshirildi.
Yigʻilish davomida masʼul shaxslarning axborotlari tinglandi, takliflar koʻrib chiqildi va aniqlangan kamchiliklarni bartaraf etish boʻyicha chora-tadbirlar belgilab olindi.