Sambo va Jangovar sambo boʻyicha Oʻzbekiston chempionatida IIV Jazoni ijro etish departamenti xodimlari muvaffaqiyatli ishtirok etishdi
2025-01-29 09:00:00 / Yangiliklar
Joriy yilning 23-26-yanvar kunlari Buxoro viloyatida Sambo va Jangovar sambo boʻyicha Oʻzbekiston chempionati boʻlib oʻtdi.
Mazkur musobaqada Jazoni ijro etish departamenti Tezkor harakatlanuvchi otryadining 14 nafar mohir sportchilari qatnashib, ulardan oʻn bir nafari sovrindorlar safidan joy olgani barchamiz uchun quvonarli boʻldi.
Qolaversa, sovrindorlarning 8 nafari Terma jamoa aʼzolari safiga qoʻshilib, aprel oyida oʻtkaziladigan Osiyo chempionatiga yoʻllanmani qoʻlga kiritdi.
Taʼkidlash joizki, gʻalabaga osonlikcha erishilmaydi.
Albatta, buning zamirida tinimsiz mehnat va harakat yotadi. Bugun ana shu mehnatlarining samarasini koʻrgan gʻoliblarni alohida eʼtirof etsak.
Musobaqada oʻz vazn toifalari boʻyicha katta leytenant Sohibjon Hasanboyev, Gʻolib Sulaymonov, Oybek Soliyevlar birinchi oʻrinni egalladilar.
Shuningdek, leytenant Elyor Hojimatov, safdorlar Elbek Abdullayev, Muhammadali Saʼdullayev, Islom Nosirov, Shahzod Davronovlar ikkinchi oʻringa sazovor boʻldilar.
Uchinchi oʻrinni esa safdorlar Beknazar Toʻraqulov, Alixon Nodirov, Shoxjaxon Temirovlar egalladi.
Gʻoliblarni muborakbod etar ekanmiz, navbatdagi musobaqalarda ham ulkan zafarlar tilaymiz.
IIV Jazoni ijro etish departamenti Axborot xizmati