Ayni paytda Navoiy viloyati IIB JXX JTSB Kinologiya boʻlinmasi 3-sonli kinologiya guruhining kichik inspektori, kichik serjant Oybek Joʻrayev xizmat iti “Tomik” bilan koʻplab musobaqalarda qatnashib, oʻtgan yili ichki ishlar organlari kinolog xodimlari oʻrtasida oʻtkazilgan koʻpkurash musobaqasining respublika bosqichida faxrli birinchi oʻrinni qoʻlga kiritgan.

II bugun ham xizmat yoʻriqnomasiga oʻz vaqtida yetib keldi. Yoʻnalishlari boʻyicha tanishgach, jinoyatlarni “issiq izida” fosh etishda xizmat itlari ishtirokini oshirish, mashgʻulotlarga oʻrgatishda masʼuliyat bilan yondashish lozimligi yana bir bor taʼkidlandi.

Lavhamiz qahramoni tushdan keyin “Samarqand” muntazam YPX maskaniga, nazorat-reyd tadbiriga jalb etildi. Unga qadar barcha kinologlar maxsus maydonda xizmat itlari bilan turli mashqlarni bajarishga kirishdi. Oybek ham “Tomik” laqabli jonivor bilan belgilangan harakatlarni amalga oshirdi.

Mashgʻulotlar davomida xizmat itlarini jinoyatchini qoʻlga olishga, izlarni qidirishga, giyohvandlik moddalarini izlab topishga oʻrgatamiz, — deydi kichik serjant Oybek Joʻrayev. — Yangi biriktirilgan xizmat itini sohaga oʻrgatish bir xil kechmaydi. Shu bois mashgʻulotlar davomida nafaqat jonivorlar, balki biz — kinolog xodimlar ham birgalikda jismoniy-jangovar mashgʻulotlarda qatnashamiz.

Xullas, kichik serjant Oybek Joʻrayev kunning ikkinchi yarmida xizmatni “Samarqand” YPX maskanida davom ettirdi. Yoʻl-patrul xizmati inspektori bilan birga shubha qilingan yuk mashinalari va qoʻshni viloyatdan kelgan avtotransport vositalari toʻxtatilib, tekshirildi.

“Damas” avtomashinasi toʻxtatilganida, “Tomik” negadir haydovchi yonida ketayotgan 45-50 yoshlardagi yoʻlovchiga qarab tinmay hura boshladi. Kinolog Oybek Joʻrayev itni mashinaga yaqinroq olib borgani sari itning vajohati ortdi. Bu bekorga emas ekan. Yoʻlovchining yonidan gugurt qutilariga joylangan giyohvandlik vositalari topildi. Haydovchi esa, qidiruvdagi shaxs boʻlib chiqdi.

Yigirma ikki yillik tajribaga ega Oybek Joʻrayev oʻz ustida tinimsiz izlanishi va xizmat faoliyatiga masʼuliyat bilan yondashishi sabab jamoa oʻrtasida hurmat-eʼtibor qozongan. “Xavfsiz hudud”, “Qoradori” kabi tadbirlarda faol qatnashib, hudud osoyishtaligiga hissa qoʻshmoqda.

©️ “Postda” gazetasi, Mahliyo Xolova, Navoiy viloyati.