O‘zbеkiston Rеspublikаsi Ichki ishlаr vаzirligi

- Bugun nega yertoʻlada yotding? — soʻradi chamasi 12 yoshli boladan mahalla profilaktika inspektori, kapitan Komil Hayitov.

- Ota-onam uydan haydavordi.

- Biron narsa yedingmi?

Komil oʻyga toldi: “Qanaqa odamlara, bular? Kimlardir tirnoqqa zor, bular esa toʻrt muchasi soppa-sogʻ, aqlli-hushli bolasini koʻchaga tashlab qoʻygana?! Esiz, hayf ota-ona degan nom...”

U avval bir necha bor bolani uyiga olib borib, ota-onasiga “Farzandingizni uydan haydamang, aks holda, sizlarni ota-onalik huquqidan mahrum qilish boʻyicha tegishli idoralarga xat kirita-man”, deb ogohlantirgan. Ammo ularga ichkilik boʻlsa bas, bola kerak emas.

Ogohlantirishlar natija bermasligini anglab yetgan profilaktika inspektori bolani mashinasiga oʻtqazib, Voyaga yetmaganlarga ijtimoiy-huquqiy yordam koʻrsatish markaziga olib ketdi.

Komil uyida kunda-kunora boʻladigan janjallardan bezib tunlarni yertoʻlalarda oʻtkazgan boʻlsada, qadrdon goʻshasidan ayrilgisi kelmayotgan bolakayning koʻziga qarashga jurʼat topolmadi. Uning koʻzida achchiq yosh qalqib turgani shundoq koʻrinib turardi.

- Afsuski, oʻtgan yili 10 nafar bolani Voyaga yetmaganlarga ijtimoiy-huquqiy yordam koʻrsatish markaziga joylashtirdik. Qarovsiz va nazoratsiz qolgan bunday bolalarning koʻzida yalt etgan yoshni koʻrib, dilingiz ogʻriydi. Bu koʻz yoshlar yuragingizga oqqandek boʻladi. Bunday salbiy holatlarning oldini olish maqsadida ichkilikbozlikka ruju qoʻygan 3 nafar, muqaddam sudlangan 5 nafar shaxsni profilaktik hisobga oldik, — deydi Sergeli tumanidagi “Sadoqat” mahallasi profilaktika inspektori, kapitan Komiljon Hayitov kuyungancha.

Darhaqiqat, oʻtgan yili 220 nafar fuqaroga nisbatan maʼmuriy choralar koʻrilgan. 2 nafar fuqaro maʼmuriy qamoqqa olingan, 2 nafari Toshkent shahar IIBB Reabilitatsiya markaziga joylashtirilgan.

4100 nafardan ortiq aholi istiqomat qiladigan mahalla koʻrilgan profilaktik chora-tadbirlar samarasi oʻlaroq, bugun “yashil” toifada. 1101 ta oiladan 9 tasi “Temir daftar”ga kiritilgan. “Ayollar daftari” roʻyxatidagi xotin-qizlar soni esa 110 nafarni tashkil etadi.

Imtiyozli kredit va subsidiyalar ajratish, oʻzini oʻzi band qilish va korxonalarga ishga joylashtirish hisobiga oʻtgan yili 97 nafar fuqaroning bandligi taʼminlanishiga erishilgan.

Bularning barchasi hududda jinoyatchilikka qarshi kurashishda koʻngildagidek natijalar qoʻlga kiritilishida muhim asos boʻlmoqda.

©️ “Postda” gazetasi, Shuhrat Roʻziyev, Toshkent shahri.