Toshkent shahar IIBB boshligʻi general-mayor Aziz Tashpulatovning poytaxt fuqarolari bilan navbatdagi shaxsiy qabuli boʻlib oʻtdi
2025-01-17 11:10:00 / Yangiliklar
Joylarda rahbar xodimlarning aholi bilan yaqindan muloqot yuritib, ularni qiynayotgan, oʻylantirayotgan masalalar, muammolariga yechim, savollariga javob topish borasidagi ochiqdan-ochiq muloqotlar joriy yilda ham davom ettirilmoqda.
Fikrimizning isboti oʻlaroq bugun Toshkent shahar IIBB asosiy binosida Bosh boshqarma boshligʻi, general-mayor Aziz Tashpulatovning poytaxt fuqarolari bilan navbatdagi shaxsiy qabuli boʻlib oʻtganini taʼkidlash joiz. Unda oʻttizga yaqin fuqarolar oʻzlarining huquqiy, ijtimoiy, maishiy va boshqa turdagi murojaatlari bilan qatnashdi.
Aksariyat fuqarolarning murojaatlari shu yerning oʻzida tezkor hal etildi. Qoʻshimcha oʻrganish va tekshiruv talab qiladigan murojaatlar rahbar tomonidan qatʼiy nazoratga olindi. Murojaatlarni mazmunan tahlil etadigan boʻlsak, mahalla obodonligini yaxshilash, hudud sektorlaridagi mavjud muammolar, tergovga qadar tekshiruv va tergov jarayonlari bilan bogʻliq holatlar tashkil etdi.
Fuqarolarning aksariyati huquqiy tushuntirish va qonuniy maslahatlardan qoniqish hosil qilishdi. Poytaxt aholisi muammolariga birgalikda ijobiy yechim topish, savollariga qonunan javob berish, manfaatlarini himoya qilish borasidagi uchrashuv va muloqotlar muntazam davom ettiriladi.
Toshkent shahar IIBB Axborot xizmati