O‘zbеkiston Rеspublikаsi Ichki ishlаr vаzirligi

Namangan davlat universitetida 18419 nafar talaba tahsil oladi. Oliy taʼlim dargohiga biriktirilgan profilaktika inspektori, mayor Azizbek Toʻxtaboyev talabalarga oʻzi haqidagi maʼlumot va telefon raqamlari aks etgan tashrifnomalarni tarqatgan.

Universitetda professor-oʻqituvchilar va boshqa xodimlar orasida 2024-yil davomida huquqbuzarlik holatlari sodir etilmadi. Oʻquv yili davomida “Davomat”, “Tigʻ”, “Oriyat” tadbirlarida darsga oʻz vaqtida kelmayotgan, ichki tartib-qoidalarga boʻysunmayotgan yoshlar aniqlanib, ular bilan tushuntirish ishlari olib boriladi. Yoshlar oʻrtasida giyohvandlik va psixotrop moddalar aylanishining oldini olish yuzasidan narkologiya dispanseri xodimlari bilan hamkorlikda davra suhbati tashkil etildi.

Har bir talabaning yurish-turishi doimiy eʼtiborimizda. Ijarada yashovchi talabalar roʻyxati shakllantirilib, ular istiqomat qilayotgan xonadonlarga birma-bir borib, yashash sharoitlarini oʻrgandik. Jinoyat va huquqbuzarlikka moyil talabalar bilan yakka tartibda profilaktik ishlar amalga oshirib kelmoqdamiz, — deydi mayor Azizbek Toʻxtaboyev.

Amalga oshirilgan targʻibot tadbirlari natijasida universitetda jinoyat sodir etish holati 2024-yilda avvalgi yilga nisbatan keskin kamaydi.

Shuningdek, korrupsiyaning oldini olish va uning kelib chiqish sabablarini oʻrganish maqsadida turli tadbirlar tashkil etildi. Huquq-tartibot va mudofaa organlari hamkorligida yoshlar oʻrtasida huquqbuzarlik va jinoyatchilikning oldini olish, ijarada yashovchi talabalar holidan xabar olish, iqtidorli yoshlarni qoʻllab-quvvatlash, maʼnaviy-maʼrifiy, vatanparvarlik va sport yoʻnalishlari boʻyicha jami 180 ta targʻibot tadbiri oʻtkazildi.

Ayni paytda universitetda 3 nafar profilaktika inspektori faoliyat yuritmoqda. Mayorlar Dilmurod Karimov va Zuhra Karimova bilan hamkorlikda talabalar oʻrtasida huquqbuzarlik va jinoyatlarning oldini olish maqsadida “Harbiy qismlarga tashrif”, “Jazoni ijro etish muassasalariga tashrif”, “Adliya va yoshlar”, “Prokuror va yoshlar”, “IIB va yoshlar”, “Deputat va yoshlar”, “Uch avlod uchrashuvi” tadbirlari tashkil etildi.

Universitetda xorijlik talabalar ham tahsil oladi. Yaqinda tibbiyot fakultetida tahsil oluvchi hindistonlik talabalar oʻrtasida oʻtkazilgan davra suhbatida universitet ichki tartib-qoidalari va odob-axloq kodeksi bilan tanishtirildi.

Oʻtkazilayotgan barcha tadbirlar universitet hududida jamoat tartibini saqlash, jinoyat va huquqbuzarliklarning barvaqt oldini olishga qaratilgani bilan ahamiyatlidir, — deydi mayor Zuhra Karimova.

©️ “Postda” gazetasi, Gulchehra Buvamirzayeva, Namangan viloyati.