Qashqadaryo viloyatida sud jarayonlaridagi nizoli holatlarni bartaraf etish boʻyicha seminar oʻtkazildi
2025-01-06 09:15:00 / Yangiliklar
Qashqadaryo viloyati IIBda viloyat sudi fuqarolik ishlari boʻyicha sudlov hayʼati raisi, sudyalari, FIB Kasbi va Qarshi tumanlararo sudi sudyalari hamda viloyati Ichki ishlar boshqarmasi boshligʻi oʻrinbosari, IIV SHXBB Qashqadaryo viloyati boʻyicha boshqarmasi masʼul xodimi, boshqarma sohaviy xizmatlari masʼul xodimlari va shahar-tuman IIB boshliqlarining maʼnaviy-maʼrifiy ishlar boʻyicha oʻrinbosarlari ishtirokida “Sud jarayonlarida yuzaga kelayotgan nizoli holatlarni bartaraf etish” mavzusida seminar boʻlib oʻtdi.
Seminar mashgʻulotini viloyat Ichki ishlar boshqarmasi boshligʻining oʻrinbosari – Maʼnaviy maʼrifiy ishlar va kadrlar bilan taʼminlash xizmati boshligʻi podpolkovnik T.Mamatkulov ochib, xodimlar tomonidan xizmat intizomi va qonunchilik talablari, mehnat shartnomasiga rioya etmaslik ortidan yuzaga kelayotgan bahsli holatlarga javob topish maqsadida mazkur yigʻilishga sudi fuqarolik ishlari boʻyicha sudlov hayʼati raisi, sudyalari taklif etilganini taʼkidladi.
Kun tartibidagi masalalar yuzasidan Qashqadaryo viloyat sudi fuqarolik ishlari boʻyicha sudlov hayʼati raisi va sudyalari soʻzga chiqib, Mehnat shartnomasini ish beruvchining tashabbusiga koʻra bekor qilish asoslari va bu borada yoʻl qoʻyilayotgan kamchiliklar mavzusida maʼruza qilishdi.
Ochiq muloqot, savol-javoblar asosida kechgan seminar yakunida huquq-tartibot organlari xizmatchilari mamlakatimizda demokratik huquqiy davlat va erkin fuqarolik jamiyatini shakllantirish borasida qabul qilinayotgan qonunlarning mazmun-mohiyatini avvalambor oʻzi anglashi va buni fuqarolar ongiga singdirishi lozimligi taʼkidlandi. Ana shunda mamlakatimizda qonun ustuvorliga va xalqimiz farovonligiga erishish, ortiqcha ovoragarchiliklarning oldi olinishi qayd etildi.
Qashqadaryo viloyati IIB Axborot xizmati