Mazkur vazifalar ijrosini taʼminlash maqsadida, joriy yilning 24-dekabr kuni Ichki ishlar vaziri general-leytenant Poʻlat Bobojonov rahbarligidagi ishchi guruh Toshkent shahrining Sirgʻali va Yangihayot tumanlarida oʻrganish ishlarini olib bordi. Ushbu tadbirlarda soha mutasaddilari, hamkor tashkilotlar vakillari hamda mahalliy hokimlik organlari ishtirok etdi.

Jumladan, ishchi guruh tomonidan poytaxtimizning Sirgʻali tumani “Farogʻatli” mahallasida joylashgan “Veolia Energy Tashkent” qoʻshma korxonasi, shu tuman “Sofdil” mahallasidagi “Hududiy elektr tarmoqlari” aksiyadorlik jamiyati, tumanning “Ziynat” va “Ezgulik” mahallalariga xizmat koʻrsatuvchi “Hayot” boshqaruv servis kompaniyasi, shuningdek Yangihayot tumanidagi “Aktam Taʼmir Servis” boshqaruv servis kompaniyasi faoliyatlari oʻrganilib, aholini kuz-qish mavsumida elektr energiya bilan uzluksiz taʼminlanganligi hamda avariyaviy va boshqa noxush holatlar yuzaga kelishini oldini olish va bartaraf etish choralari samarali tashkil etilganligi bilan tanishildi.

Oʻrganishlar jarayonida aholi turar joylarida elektr energiyasi va issiq suv barqarorligi taʼminlanib kelayotganligiga, masʼul idora va tashkilotlarda barcha zarur texnikalar mavjudligi hamda zaxira resurslari gʻamlanganligiga alohida eʼtibor qaratildi.

Tadbir davomida ishchi guruh tomonidan Sirgʻali tumani ichki ishlar organlari faoliyatini muvofiqlashtirish boshqarmasi faoliyati oʻrganildi. Jarayonda, tungi xizmatga jalb etilgan shaxsiy tarkib va biriktirilgan kuch va vositalarning shayligi, shuningdek ularning tezkor vaziyatni barqarorligini taʼminlashga tayyorgarligi tekshirilib, xizmat faoliyatini takomillashtirish yuzasidan aniq vazifalar berildi.

Shuningdek, ichki ishlar organlari faoliyatini takomillashtirish hamda fuqarolarga qulaylik yaratish maqsadida Yangihayot tumani “Yoʻldosh” mavzesida yangidan barpo etilayotgan Yangihayot tumani ichki ishlar organlari faoliyatini muvofiqlashtirish boshqarmasi binosidagi qurilish ishlari bilan tanishildi. Mutasaddilarga idorani qisqa muddatlarda sifatli qurib bitirib, faoliyat boshlashiga qaratilgan koʻrsatmalar berildi.

Tadbir jarayonida ishchi guruh Yangihayot tumanida faoliyat koʻrsatayotgan “Mehribogʻ” nomidagi madaniyat va istirohat bogʻida xizmatni tashkil etish, fuqarolar xavfsizligini qay darajada taʼminlanganligi hamda majmuada Yangi yil bayramini oʻtkazish jarayonida aholi uchun yaratilgan shart-sharoitlar oʻrganildi.

Majmuaga xavfsizlikni taʼminlashga jalb qilingan xodimlarning axborotlari tinglandi, ularning huquqbuzarliklarni oldini olish boʻyicha tezkor shaylik holati nazorat tariqasida tekshirildi, shuningdek huquqni muhofaza qiluvchi organlari bilan hamkorlikda xizmatni tashkillashtirish borasida tegishli koʻrsatmalar berildi.

Oʻrganishlar jarayonida, aniqlangan barcha kamchiliklar tanqidiy muhokama qilinib, kelgusida xizmat faoliyatini takomillashtirishga oid maqsadli chora-tadbirlar belgilab olindi.

Ishchi guruhning oʻrganishlari mamlakatimizning boshqa hududlarida davom etmoqda.