Yangi yil bayramini oʻtkazishga tayyorgarlik jarayonlari muhokama etildi
2024-12-24 10:35:00 / Yangiliklar
23-dekabr kuni Xorazm viloyati Ichki ishlar boshqarmasida tashkil etilgan idoralararo hamkorlikdagi tezkor shtabda huquq-tartibot va nazorat organlarining masʼul xodimlari ishtirokida yigʻilish boʻlib oʻtdi.
Unda Yangi yil bayramini yuqori saviyada oʻtkazish, bayram kunlari va yangi yil archasi oʻrnatilgan hududlarda jamoat tartibini saqlash va aholi xavfsizligini taʼminlash masalalari muhokama etildi.
Yigʻilishda Xorazm viloyati IIB boshligʻi polkovnik Ravshan Sultanxodjayev joriy yilda viloyatimiz aholisi va mehmonlariga yuqori darajadagi bayram kayfiyatini ulashish maqsadida chora-tadbirlar dasturi ishlab chiqilganligini hamda ushbu dastur ijrosini taʼminlashga masʼul boʻlgan organlarga aniq yoʻnaltirilgan topshiriqlar berilganligini taʼkidlab oʻtdi. Shu bilan birgalikda bayram tadbirlarni oʻtkazish jarayonida jamoat tartibini saqlash va aholi xavfsizligini taʼminlash asosiy vazifalardan biri sifatida qayd etilganligi yigʻilishda ishtirok etayotgan masʼullar eʼtiboriga yetkazilib, bunda ichki ishlar organlari umumiy koordinator sifatida belgilanganligi aytib oʻtildi.
Shundan kelib chiqqan holda Yangi yil archasi oʻrnatilgan hududga tutash avtomobil yoʻllarida transport vositalarining harakatlanishini oʻrnatilgan tartibda vaqtinchalik cheklash, Yangi yil archasi va Yangi yil savdo yarmarkasi tashkil etiladigan hududlarda yoʻl harakati va yongʻin xavfsizligi qoidalariga qatʼiy rioya qilish, turli noxush holatlarning kelib chiqishiga yoʻl qoʻymaslik boʻyicha masʼullarga topshiriqlar berildi.
Bayram tadbirlari boʻlib oʻtadigan hududlarda jamoat tartibini saqlash jarayonini tashkil etishda ilk marotaba intellektual kuzatuv kameralaridan foydalanish amaliyoti yoʻlga qoʻyilganligi va ushbu imkoniyatdan samarali foydalanish zarurligi uqtirildi.
Yigʻilishda muhokama etilgan masalalar yuzasidan tegishli qarorlar qabul qilindi.
Xorazm viloyati IIB Axborot xizmati