Yoshlar taqdiriga hammamiz masʼulmiz
2024-12-24 10:25:00 / Yangiliklar
Yurtimizda yoshlar masalasi hamisha eʼtibor markazida boʻlib kelgan. Ayniqsa keyingi yillarda mazkur yoʻnalishdagi ishlar davlat siyosati darajasiga koʻtarildi.
Madaniyat vaziri Ozodbek Nazarbekov Ichki ishlar vazirligi akademiyasi magistraturasida taʼlim olayotgan tinglovchilar bilan muloqot qildi.
Uchrashuv avvalida madaniyat va sanʼat sohasida amalga oshirilayotgan islohotlar, milliy madaniy merosimizni asrash va kelgusi avlodlarga yetkazish yoʻlidagi xayrli ishlar, bu boradagi turli loyiha va tadbirlarning ahamiyati haqida soʻz bordi.
Vazirlik mutasaddisi Yangi Oʻzbekistondagi keng qamrovli oʻzgarishlarni eʼtirof etib, yoshlar taʼlim-tarbiyasi bilan bogʻliq dolzarb masalalarga eʼtibor qaratdi. Unib-oʻsib kelayotgan bugungi avlod murakkab davrda yashayotgani, ularning ongi va qalbini yot gʻoyalar taʼsiridan asrash, vatanparvarlik fazilatlarini yuksaltirish, yoshlarda zamonaviy tahdid va xatarlarga qarshi mustahkam maʼnaviy immunitet hosil qilish ustuvor vazifalardan ekanligini qayd etdi.
Samimiy ruhda oʻtgan tadbir davomida yoshlar bilan manzilli ishlashning muhim yoʻnalishlari, ayni sohada amalga oshirilayotgan ishlar va kelgusidagi vazifalar xususida fikr almashildi. Shuningdek, madaniyat vaziri magistraturada yoʻlga qoʻyilgan innovatsion taʼlim jarayonlari bilan tanishib, islohotlar davrida akademiyada erishilgan yutuqlarga bagʻishlangan videorolikni tomosha qildi.
IIV akademiyasi Axborot xizmati