Surxondaryo viloyati huquq-tartibot idoralari rahbarlari huzurida “Prezident archasi” hamda Yangi yil bayramini tinch osoyishta oʻtkazish maqsadiga qaratilgan tezkor yigʻilish oʻtkazildi
2024-12-22 11:45:00 / Yangiliklar
Joriy yilning 22-dekabr kuni Surxondaryo viloyati IIBda viloyat Ichki ishlar boshqarmasi, DXX Surxondaryo viloyati boshqarmasi, Milliy gvardiya viloyat boshqarmasi hamda viloyat Favqulodda vaziyatlar boshqarmasi boshliqlari huzurida videoselektor tarzidagi tezkor yigʻilish boʻlib oʻtdi. Mazkur yigʻilishda viloyat huquq-tartibot idoralari rahbarlarining oʻrinbosarlari, sohaviy xizmat boshliqlari, shahar-tuman IIB studiyalaridan tuman huquq-tartibot idoralari boshliqlari, oʻrinbosarlari va sohaviy xizmat rahbarlari ishtirok etishdi.
Oʻtkazilgan yigʻilishda, “Prezident archasi” hamda Yangi yil bayramini tinch osoyishta oʻtkazish, bayram va savdo yarmarkalari oʻtkazilayotgan joylarda jamoat tartibini saqlash, fuqarolar va yoʻl harakati xavfsizligini taʼminlash, viloyat hududida huquqbuzarlik va jinoyatchilikning barvaqt oldini olish, kriminogen vaziyati ogʻir boʻlgan hududlar, jinoyatchilikni jilovlash choralarini koʻrish va kuchaytirish masalalari yuzasidan masʼullarga tegishli koʻrsatmalar berildi.
Shuningdek, yigʻilish davomida Pirotexnika vositalarining viloyat hududiga noqonuniy kirib kelishi hamda savdosiga qarshi keskin chora-tadbirlar amalga oshirilishi yuzasidan topshiriqlar berildi.
Viloyat hamda tuman studiyalarida ishtirok etayotgan masʼullarning taklif va muammolari oʻrganilib, ularni bartaraf etish yuzasidan tegishli chora-tadbirlar belgilab olindi.
Yigʻilish yakunida, xalqning bayramona kayfiyatiga salbiy taʼsir koʻrsatuvchi har qanday noxush holatlarning oldini olish, aholini elektr energiyasi va gaz taʼminoti, issiqlik manbai bilan uzluksiz taʼminlash choralari koʻrilishi yuzasidan tegishli topshiriqlar berildi.
Surxondaryo viloyati IIB Axborot xizmati