“Obod va xavfsiz mahalla” tamoyili asosida amalga oshirilayotgan ishlar muhokama qilindi
2024-12-20 15:40:00 / Yangiliklar
“Obod va xavfsiz mahalla” tamoyili asosida xavfsiz muhitni yaratish mexanizmi boʻyicha amalga oshirilgan ishlarni oʻrganish natijasi yuzasidan yigʻilish oʻtkazildi.
Viloyat hokimi Zoyir Mirzayev hamda IIBB boshligʻi T. Aripov raisligida oʻtgan yigʻilishda sektor rahbarlari, prokuratura, ichki ishlar organlarining tegishli sohaviy xizmat vakillari, shuningdek, boshqa taalluqli tashkilot va idoralar masʼullari ishtirok etdi. Unda joriy yil davomida hududlarda huquqbuzarliklarning barvaqt oldini olish, ijtimoiy profilaktika borasida belgilangan ustuvor vazifalar ijrosining ahvoli, shuningdek yoʻl qoʻyilayotgan kamchiliklar muhokama etildi.
Viloyatda joriy yil boshidan ijtimoiy profilaktika obyekti hisoblangan 14 toifadagi 69 ming 928 nafar fuqaroda aniqlangan muammolarini ijobiy hal etish boʻyicha “E-Ijtimoiy profilaktika” elektron tizimi orqali profilaktika inspektorlari tomonidan mahalladagi masʼullarga xulosalar taqdim etilgan. Shundan 1,3 foiz xulosalar bajarilmaganligi tanqid qilindi. Asosan, Angren shahar, Toshkent, Oʻrtachirchiq tumanlariga hissasiga toʻgʻri kelayotganligi taʼkidlandi.
Shuningdek, mahallada faoliyat olib boruvchi “yettilik” vakillarining uzviy hamkorligini yoʻlga qoʻygan holda ish samaradorligi erishish zarurligi borasida soʻz yuritildi.
Yigʻilish soʻngida qaror doirasida kelgusida amalga oshirilishi lozim boʻlgan ishlar belgilab olindi.