Oʻzbekiston Respublikasi IIVning ixtisoslashtirilgan maktab-internatida Botir Zokirov tavalludining 88-yilligiga bagʻishlangan “Kuylamoq -yashamoq demakdir!” nomli konsert dasturi boʻlib oʻtdi
2024-12-18 09:22:00 / Yangiliklar
Oʻzbekiston Respublikasi IIVning ixtisoslashtirilgan maktab-internatida oʻzbek milliy estradasining asoschisi, tuganmas isteʼdod sohibi, xushovoz xonanda, rassom, Oʻzbekiston xalq artisti — Botir Zokirov tavalludining 88-yilligiga bagʻishlangan “Kuylamoq -yashamoq demakdir!” nomli konsert dasturi boʻlib oʻtdi.
Maʼnaviy-maʼrifiy tadbir dasturi davomida sevimli xonandamizning qoʻshiqlari maktab-internat oʻquvchilari talqinida kuylandi, hayoti va ijodi haqida maʼlumotlar berildi. Xonandaning qoʻshiqlari kuylangan milliy kinofilmlardagi taronalarni sahna koʻrinishi orqali namoyish etishdi. Tadbirga xonandaning oila aʼzosi Botir Zokirovni hammadan koʻra yaqindan bilgan Oʻzbekiston, Qoraqalpogʻiston, Qozogʻiston, Qirgʻiziston, Tojikiston, Tatariston, Ingushetiya, Boshqirdiston xalq artisti unvonlari bilan taqdirlangan, 2017-yilda Qirgʻizistonning “Doʻstlik”, 2018-yilda Oʻzbekistonning “Fidokorona xizmatlari uchun” va 2023-yilda “El-yurt hurmati” ordenlariga munosib koʻrilgan, Oʻzbekiston xalq artisti, Afsonaviy “Yalla” ansambli badiiy rahbari Farrux Zokirov tashrif buyurib, Botir Zokirovning sanʼat yoʻli haqida, uning sanʼatga muhabbati toʻgʻrisida toʻlqinlanib gapirdi. Farrux Zokirov oʻz nutqida bu tadbirdan oʻzgacha zavq olganini, maktab-internat oʻquvchilarining sanʼatga boʻlgan qiziqishi va intilishlarini eʼtirof etdi. Tadbir ishtirokchilari ijro etgan qoʻshiqlarga tomoshabinlar ham joʻr boʻlishdi. Maʼnaviy-maʼrifiy tadbir koʻtarinki ruhda oʻtdi va oʻquvchilarda katta taassurot qoldirdi.
Bunday tadbirlarning oʻtkazilishi yosh avlod qalbida sanʼatga boʻlgan muhabbatni shakllantirishda dasturul amal boʻladi. Zero, musiqa ezgulik uchun xizmat qiladi, qalbi sanʼatga oshufta inson har doim yaxshilik tarafdori boʻladi.
IIVning ixtisoslashtirilgan maktab-internati