Belgilangan vazifalarning ijrosini nazorat qilish hamda samarasini oshirish maqsadida ishchi guruh tomonidan, joriy yilning 16-dekabr kuni soha masʼullari hamda hamkor tashkilotlarning mutasaddilari ishtirokida poytaxtimizning Olmazor va Shayxontohur tumanlarida aholi uchun yaratilgan sharoitlar bilan tanishildi.

Jumladan, Toshkent shahar Olmazor tumani “Shon-shuhrat” mahallasini issiqlik va elektr energiyasi bilan taʼminlovchi Turkiyaning “Iletekno” kompaniyasi tomonidan kogeneratsiya texnologiyalarini joriy etish loyihasi, tumanning “Universtitet” mahallasi, Farobiy koʻchasida joylashgan “Olmazor Holding Grand” boshqaruv servis kompaniyasi, Olmazor tumani “Quyosh” mahallasida joylashgan “Olmazor tumani elektr taʼminoti korxonasi” faoliyati bilan tanishildi.

Jarayonda tungi xizmatga jalb etilgan huquq-tartibot idoralari, hokimlik, kommunal-tezkor xizmatlar masʼullari hamda issiqlik energiya korxonalari rahbarlarining bayonotlari eshitildi.

Hududlarda kommunal tezkor xizmatlar va favqulodda vaziyatlar xizmatining murakkab yoki avariyaviy holatlarni zudlik bilan bartaraf etish faoliyatiga baho berish maqsadida Olmazor tumani “Universitet” mahallasi uchun “Oʻquv tashvish” tadbiri eʼlon qilinib, masʼullarning tezkor ish jarayoni oʻrganildi.

Tadbir jarayonida aniqlangan barcha kamchiliklar tanqidiy muhokama qilinib, kelgusida xizmat faoliyatini takomillashtirishga oid maqsadli chora-tadbirlar belgilab olindi.

Shuningdek, ishchi guruh tomonidan ob-havoning murakkab sharoitlarida aholiga benuqson xizmat koʻrsatilishi va xavfsizlik choralarini toʻliq taʼminlanishi vazifalarini oʻrganish uchun Shayxontohur tumani Favqulodda vaziyatlar boʻlimi xodimlarining xizmat va jangovar shayligi tekshirildi.

Tadbir davomida ishchi guruh tomonidan Olmazor tumani “Olimpiya” mahallasida joylashgan nogironligi boʻlgan bolalar uchun 1-sonli “Muruvvat” internat uyida yaratilgan shart-sharoitlar, shuningdek “Ibn Sino” nomidagi 1-son shahar klinik shifoxonasida bemorlar uchun yaratilgan sharoitlar va tashkil etilgan hushyorxona faoliyati bilan tanishildi.

Ishchi guruh aʼzolarining kundalik oʻrganish ishlari mamlakatimizning boshqa hududlarida ham davom etmoqda.