Yuksak mukofot sohiblari. Hamon izlanishda
2024-12-15 11:50:00 / Yangiliklar
Xizmat faoliyatini boshlaganiga qariyb 27 yil boʻlganiga qaramay, podpolkovnik Marhabo Hojiyeva hamon izlanishda. U sohaviy bilimlarini oshirish uchun oʻz ustida ishlashdan, tegishli adabiyotlarni oʻqishdan toʻxtamaydi.
- Bu kasbni tanlashimga rahmatli otam isteʼfodagi mayor Hikmatillo Hojiyev sababchi boʻlganlar. Padari buzrukvorim 30 yildan ortiq Nurota tumani IIBda faoliyat koʻrsatganlar. Onam Xursan Ibragimova esa koʻp yillar maktabda oʻquvchilarga taʼlim-tarbiya berganlar. Opalarim onamga oʻxshab oʻqituvchilik kasbini tanlashdi.
Ulgʻayganimda ichki ishlar sohasini tanlashimni aytganimda, otam «Ilohim, polkovnik boʻl!» deb duo qildilar. Onam esa «Qiz bolasan, ertaga oila qurasan. Keyin bu sohada ishlashga qiynalasan», deb biroz qarshilik qildilar. Har safar navbatdagi unvonni olganimda, otamning duolari yodimga tushadi, - deydi Navoiy shahar IIB huzuridagi Tergov boʻlimi katta tergovchisi, podpolkovnik Marhabo Hojiyeva.
Uzoq yillik xizmat faoliyati mobaynida koʻplab jinoyatlarni tergov qilib, boy tajribaga ega Marhabo opa qator shogirdlar tarbiyalab yetishtirdi. Hozirga qadar ularga amaldagi qonunchilik talablariga qatʼiy rioya etish, fuqarolarning huquq va manfaatlarini himoya qilish, eng asosiysi, tergov jarayonini xolisona, odillik bilan olib borish lozimligini taʼkidlaydi.
El-yurt osoyishtaligini taʼminlash yoʻlidagi fidoyilarcha xizmati va kasbga sadoqati uchun podpolkovnik Marhabo Hojiyeva Prezidentimizning 2024-yil 24-oktyabrdagi farmoniga muvofiq «Sodiq xizmatlari uchun» medali bilan taqdirlandi.
- Men onamning ishlarini davom ettirayotganimdan faxrlanaman. Vatanimizning yuksak mukofotiga sazovor boʻlganlaridan barchamiz cheksiz quvondik. Uka-singillarim Ulugʻbek, Mehrigiyo va Mohichehra ham kelajakda ota-onamiz kasbini davom ettirishmoqchi, — deydi uning oʻgʻli, Navoiy viloyati IIB JXX JTSB maxsus qabulxonasining katta inspektori, serjant Muhammadali Hakimov.
Ha, Marhabo Hojiyevaga har tomonlama baxt, omad kulib boqqan desak mubolagʻa boʻlmaydi. Chunki uni qoʻllab-quvvatlaydigan turmush oʻrtogʻi, shogirdlari, farzandlari bor. Umr yoʻldoshi Qahramon Muhammatov shu sohada xizmat qilib, pensiyaga chiqqan. Shuning uchun uni yaxshi tushunadi.
- Men ishxonada tergovchi Marhabo Hojiyevaman, — deydi u mayin tabassum bilan. Uyda esa mehribon ona, sarishtali uy bekasi boʻlishga harakat qilaman.
Darhaqiqat, lavhamiz qahramoni hayotda uchragan toʻsiqlarni sabr-matonat, goʻzal xulq-atvori bilan yengib oʻtgani uchun ham oilada, ham xizmatida muvaffaqiyatga erisha oldi. Shu kasbni tanlaganidan hech qachon afsuslanmadi.
Mahliyo Xolova, oʻz muxbirimiz. “Postda”
Navoiy viloyati