Toshkent viloyati ichki ishlar organlarida “Zoʻravonlikka qarshi faol 16 kun” aksiyasi doirasida amalga oshirilgan ishlar tahlil qilindi
2024-11-29 10:45:00 / Yangiliklar
Toshkent viloyati ichki ishlar organlarida xizmat qilayotgan xotin-qizlarni har tomonlama qoʻllab-quvvatlash, ijtimoiy-siyosiy faolligini oshirish va yosh avlodda vatanga muhabbat, kasbga fidoiylik hissini shakllantirish boʻyicha amal oshirilgan ishlar yakuniga bagʻishlangan targʻibot tadbiri — hisobot yigʻilishi oʻtkazildi.
Tadbirda Toshkent viloyati ichki ishlar organlarida xizmat qilayotgan ayol xodimlar, Akademik litsey oʻquvchi qizlari, IIBB masʼul rahbarlari va mehmonlar ishtirok etdi.
Yigʻilish avvalida, 25-noyabr kuni “Zoʻravonlikka qarshi 16 kunlik faol harakat” global kampaniyasi boshlangani va bu tashabbus Xalqaro ayollarga nisbatan zoʻravonlikka qarshi kurash kuni bilan bogʻliq boʻlib, ayollar va bolalarga nisbatan zoʻravonlikni barham berish uchun jamiyatning barcha qatlamlarini birlashtirish zarurligi taʼkidlandi. Xususan, ichki ishlar organlaridagi ayol xodimlar bu borada yetakchi boʻlishi, zoʻravonlikka qarshi kurashni oʻz xizmat vazifasi va insoniy burchi deb bilishi kerakligi masʼullar tomonidan aytib oʻtildi. Tadbir davomida bu yoʻnalishdagi amalga oshirilgan ishlar tahlil qilindi.
Soʻzga chiqqanlar, davlat rahbari tashabbusi bilan zoʻravonlikka qarshi tizimli ishlar jadallashtirilganini, “Inson qadri uchun” tamoyili asosida qonunlar takomillashtirilgani va jazo choralari qatʼiylashtirilganini alohida taʼkidlab oʻtdilar.
Yigʻilishda, shuningdek, IIV tegishli buyruqlarining ijrosi hamda viloyat ichki ishlar organlarida xizmat qilayotgan ayol xodimlar oʻrtasida tarbiyaviy, psixologik va ijtimoiy-huquqiy faoliyatni samarali tashkil etish boʻyicha amalga oshirilgan targʻibot ishlari tahlil qilindi va kelgusi rejalar belgilandi.
Jarayonda psixolog Shahnoza Tashmatova tomonidan stressni boshqarish, xotin-qizlarga nisbatan tazyiq va zoʻravonlikni oldini olish, shuningdek, xotin-qizlar orasida uchraydigan muammoli vaziyatlardan chiqish boʻyicha psixologik mashgʻulotlar oʻtkazildi.
Tadbir soʻngida, IIOda uzoq yillar munosib xizmat qilib, yorugʻ yuz bilan faxriy maqomda erishgan ayol xodimlar nafaqaga kuzatildi.
Bunday tadbirlar ichki ishlar organlarida xizmat qilayotgan ayol xodimlarni qoʻllab-quvvatlash, ularning siyosiy faolligini oshirish, oilaviy sharoitlarini va xizmat faoliyatini yaxshilashga xizmat qilishi bilan katta ahamiyatga ega.
Toshkent viloyati IIBB Axborot xizmati