Xabaringiz bor, joriy yilning 23-sentyabr kuni Prezidentimiz tomonidan “Kambagʻallikni qisqartirish va aholi turmush farovonligini oshirish borasidagi chora-tadbirlarni yangi bosqichga olib chiqish toʻgʻrisida” gi PF-143-sonli Farmoni hamda “Kambagʻallikdan farovonlik sari” dasturini amalga oshirish boʻyicha birinchi navbatdagi chora-tadbirlar toʻgʻrisida”gi PQ-330-sonli Qarori imzolanib, vazirlik va idoralar, hududiy hokimliklar va boshqa taalluqli idoralar rahbarlariga bir qator topshiriqlar berildi.

Jumladan, Buxoro viloyatida istiqomat qiluvchi kambagʻal oilalar rahbar xodimlarga biriktirib berildi.

Avval xabar berganimizdek, viloyat 3-sektori rahbari sifatida Ichki ishlar boshqarmasi boshligʻi, uning oʻrinbosarlari hamda barcha hududiy ichki ishlar organlari rahbarlariga ham kambagʻal oilalar biriktirib berilib, manzilli ishlar boshlab yuborilgan edi.

Bugun, boshqarma boshligʻi Ikromjon Tursunov Gʻijduvon tumani Koʻlijabbor mahallasida boʻlib, oʻziga biriktirilgan ushbu fuqarolarning xonadonlarida olib borilayotgan keng koʻlamli qurilish va taʼmirlash ishlarining yakuniy bosqichini koʻzdan kechirdi.

Bundan tashqari ushbu oilalarni kambagʻallikdan chiqarish boʻyicha ishlab chiqilgan individual reja asosida ularning turmush darajasini yaxshilash va daromadini oshirish, farzandlarining qiziqishlaridan kelib chiqib, turli fan va sport toʻgaraklariga jalb etilganlik, munosib va sifatli taʼlim olishlari uchun yaratib berilgan shart-sharoitlarni ham birma-bir koʻzdan kechirib, masʼullarga yana bir qator topshiriqlarini berdi.

Buxoro viloyati Ichki ishlar boshqarmasi va uning quyi organlari rahbar xodimlariga biriktirilgan har bir kambagʻal oilalar bilan manzilli ishlash boʻyicha tuzilgan yoʻl xaritalarining ijrosi alohida nazoratga olingan boʻlib, har biri boʻyicha individual reja asosida manzilli ishlar davom ettirilmoqda.

Buxoro viloyati IIB Axborot xizmati