Yoshlar kelajak bunyodkori. Maqsadli yoʻl topar
2024-10-30 07:55:00 / Yangiliklar
Hayotda erishiladigan har qanday yutuq kishining mehnatiga bogʻliq. Qoʻyilgan maqsad sari intilib, mashaqqatdan chekinmagan kishining atrofidagilarga namuna boʻla oladigan ichki ishlar organlari xodimlari juda koʻp. Ulardan biri Muzrabot tumani IIB HPB profilaktika inspektori katta leytenant Shohjahon Nuraliyev.
Lavhamiz qahramoni IIV Akademiyasini tamomlagach, ilk xizmat faoliyatini 2022-yili Denov tumanidagi “Istiqbol” mahallasida profilaktika inspektorligidan boshlagan. Hozir Muzrabot tumanidagi “Darband” mahallasi hududida jinoyatchilikni barvaqt oldini olish boʻyicha jonbozlik koʻrsatmoqda.
Hududda yashovchi 5310 nafar fuqaroning tinch va osoyishta umr kechirishi uchun astoydil harakat qilayotgan profilaktika inspektorining saʼy-harakati bilan bugun “Darband” mahallasi “yashil” toifaga kiritilgan.
Katta leytenant Shohjahon Nuraliyev bu yil profilaktika inspektorlari oʻrtasida oʻtkazilgan “Namunali profilaktika inspektori” tanlovining viloyat bosqichida gʻoliblikni qoʻlga kiritdi.
- Tanlov oldidan puxta tayyorgarlik koʻrdim. Sohaga oid adabiyotlar, meʼyoriy-huquqiy hujjatlarni qayta-qayta oʻqidim. Dunyoqarashimni kengaytirish maqsadida badiiy kitob mutolaasiga kirishdim. Harakatlarim zoye ketmadi, -deydi u.
Shohjahon detektiv asarlardan tortib, badiiy adabiyotning oltin namunalarini ham oʻqishni kanda qilmaydi. Shundanmi, “Zakovat”, “Kitobxon” tanlovlarida doimo faol. Bundan tashqari, hozirda turk tilini ham oʻrganmoqda. Til boʻyicha maxsus sertifikatni qoʻlga kiritgach, Huquqni muhofaza qilish akademiyasiga oʻqishga kirishni oʻz oldiga maqsad qilib qoʻygan.
Izlanish va oʻqish insonni yuksaltirib boradi. Faqat vaqtni toʻgʻri taqsimlab, imkon topilsa boʻlgani. Shohjahon bor imkoniyatlardan keraklicha foydalana olish koʻnikmasiga ega. Muhimi, uni ota-onasi, yaqinlari hamisha qoʻllab-quvvatlaydi. Qahramonimiz bundan yanada kuch oladi.
Feruza RAHMONQULOVA, oʻz muxbirimiz.
Surxondaryo viloyati.