Buxoro viloyati IIB boshligʻi podpolkovnik Ikromjon Tursunov Gʻijduvon tumani “Baraka” MFY aholisining muammolarini joyiga chiqib oʻrgandi
2024-10-16 10:50:00 / Yangiliklar
Boshqarma boshligʻining navbatdagi sayyor qabuli Qizilqumning yastanib yotgan choʻl massivida joylashgan viloyat 3-sektoriga qarashli Gʻijduvon tumanining “Baraka” mahallasi “Oltinsoy” aholi punktida oʻtkazildi.
Viloyat 3-sektor shtabi aʼzolari, tuman sektor rahbarlari, taalluqli idoralar masʼullari ishtirokida oʻtkazilgan ochiq muloqotda 30 dan ortiq fuqarolarning 20 ga yaqin turli masalalardagi murojaatlari birma-bir koʻrib chiqildi.
Bunda, ichimlik suvi, tabiiy gaz, elektr energiyasi taʼminotini, uyali aloqa operatorlarining aloqa tizimini yaxshilash, yoʻlni shagʻallashtirish, davolanish, maktab kutubxonasining fondini boyitish, taʼlim krediti, bolasini maktabgacha taʼlim tashkilotiga joylashtirish, hududda tadbirkorlikni yoʻlga qoʻyish, yer uchastkalarining kadastr hujjatlarini tayyorlashda amaliy yordam berish, qarovsiz qolgan mevali bogʻlarni obodonlashtirib undan samarali foydalanishni yoʻlga qoʻyish masalalari koʻtarildi.
Qabuldan soʻng boshqarma boshligʻi mahalla boʻylab “xonadonbay” tizim asosida kam taʼminlangan, ijtimoiy himoyaga muhtoj fuqarolarning mavjud muammolarini joyiga borib oʻrgandi.
Shuningdek, hududdagi umumtaʼlim maktabi hamda Maktabgacha taʼlim tashkilotida ham boʻlib, yoshlarning taʼlim-tarbiya olishlari uchun yaratilgan shart-sharoitlarni, muassasalarning kuz-qish mavsumiga tayyorgarlik darajasini koʻzdan kechirib, aniqlangan kamchiliklar yuzasidan tavsiya va topshiriqlarini berdi.
Buxoro viloyati IIB Axborot xizmati