Mafkuraviy tahdidlarga qarshi kurashishda huquqni muhofaza qiluvchi organlar oʻrtasida hamkorlik muhim hisoblanadi. Bunday hamkorlik nafaqat milliy xavfsizlikni taʼminlash, balki jamiyatda barqarorlikni saqlashda katta ahamiyat kasb etadi.

Prezidentimiz Shavkat Mirziyoyev taʼkidlaganidek: “Hech kimga sir emas, bugun dunyoda beqaror vaziyat hukm surmoqda. Xalqaro maydonda davlatlarning bir-biriga oʻzaro ishonchi susayib bormoqda. Bunday murakkab sharoitda hayotning oʻzi bizdan mamlakatimizda hukm surayotgan oʻzaro hurmat, mehr-oqibat, totuvlik va birdamlik muhitini yanada mustahkamlash, yoshlarni buzgʻunchi yot gʻoya va oqimlar, tashqi taʼsirlardan asrashga qaratilgan ishlarimizni yangi bosqichga koʻtarishni talab etmoqda”.

Shu oʻrinda huquqni muhofaza qiluvchi organlar oʻrtasida samarali maʼlumot almashinuvi mafkuraviy tahdidlarni oʻz vaqtida aniqlash va ularga javob berish imkonini berishini alohida taʼkidlash joiz.

Bu saʼy-harakatlar asosida jamiyatdagi xatarlar va tahdidlarning oldini olish choralarini koʻrishi mumkin. Har bir organ oʻz sohasiga tegishli maʼlumotlar va tajribaga ega boʻlgani uchun, ularning birgalikdagi harakatlari mafkuraviy tahdidlarga qarshi samarali kurashishda muhim ahamiyat kasb etadi.

Ushbu hamkorlikni mustahkamlash uchun qonunchilik bazasini takomillashtirish zarur. Mazkur qonun, hujjatlari mafkuraviy tahdidlarga qarshi kurashishda organlarning harakatlarini muvofiqlashtirishga va ularga huquqiy asoslarni taʼminlash-ga qaratilgan boʻlishi kerak.

Bu borada davlat siyosati ham muhim ahamiyatga ega. Zero, ushbu siyosat mafkuraviy barqarorlik va jamiyatdagi birdamlikni taʼminlashga yoʻnaltirilgan boʻlishi kerak.

Mafkuraviy tahdidlarga qarshi kurashishda barcha huquqni muhofaza qiluvchi idoralar oʻrtasidagi hamkor-lik zarurati, ayniqsa, zamonaviy ijtimoiy-siyosiy muammolar sharoitida dolzarb ahamiyat kasb etmoqda.

Zamonaviy terrorizm jamiyat ongiga, siyosiy barqarorlik va davlat institutlariga jiddiy tahdid soladi. Bu mafkuraviy tahdidga qarshi samarali kurashish huquqni muhofaza qilish organlari va boshqa tuzilmalar oʻrtasida harakatlarni aniq muvofiqlashtirishni talab qiladi.

Ichki ishlar organlari jamoat tartibini saqlash va jinoyatchilikka qarshi kurashishda asosiy rol oʻynaydi. Jamiyat ekstremizm, radikallashuv, terrorizm kabi mafkuraviy tahdidlarga duch kelayotgan bugungi sharoitda ushbu tizim xodimlarining kasbiy mahoratini oshirish zarurati yanada dolzarb boʻlib bormoqda. Ichki ishlar organlarining boshqa huquqni muhofaza qilish organlari bilan birgalikdagi faoliyati buzgʻunchi mafkuralar tarqalishining oldini olishga xizmat qiladi.

Hozirgi zamon kishisining ongiga turli-tuman axborotlar taʼsir koʻrsatmoqda. Bu esa mafkuraviy tahdidlarga qarshi kurashish jarayonini yanada qiyinlashtiradi. Jamoatchilik fikri turli stereotiplar va xurofotlar taʼsirida shakllanayotgan bir sharoitda ichki ishlar organlarining ommaviy axborot vositalari bilan oʻzaro hamkorligi mafkuraviy tahdidlarga qarshi kurashishda muhim ahamiyatga ega. Qolaversa, bu aholining huquq-tartibot idoralariga ishonchini kuchaytiradi.

Xulosa qilib aytganda, jahonda ekstremizm, radikallashuv va buzgʻunchi mafkuralarning tarqalishi kabi mafkuraviy tahdidlar kuchayib borayotgan bir sharoitda turli huquqni muhofaza qilish organlarining oʻzaro samarali hamkorligi har qachongidan ham dolzarbdir. Bu jamoat xavfsizligi va barqarorligini taʼminlashning muhim omili boʻlib xizmat qiladi.

Muallif haqida maʼlumot

Podpolkovnik Maqsud Tursunpoʻlatovich Musayev Samarqand viloyatining Urgut tumanida tugʻilgan. 2006-yilda IIV Akademiyasini, 2023-yilda esa magistraturani tugatgan.

Hozirgi kunda Samarqand shahar IIO FMB 7-son ichki ishlar boʻlimi boshligʻi lavozimida faoliyat koʻrsatib kelmoqda.

Shuningdek, “ichki ishlar organlarida mafkuraviy tahdidlarga qarshi kurashishning samarali mexanizmlari” mavzusida siyosiy fanlar boʻyicha falsafa doktori (PhD) ilmiy darajasini olish uchun ilmiy izlanishlar olib bormoqda.

©️ “Postda” gazetasi.