Qoʻshqanotlar. Ulkan orzular roʻyobi
2024-09-18 07:25:00 / Yangiliklar
Bu oilani Olmaliq shahrida koʻpchilik yaxshi biladi. Shahar IIBning turli sohaviy xizmatlarida yigirma olti yillik faoliyati davomida fidoyilik bilan xizmat qilgan isteʼfodagi podpolkovnik Timur va Gulnoza Sabriyevalar kasbidan baxt topishgan. Vaqtinchalik saqlash hibsxonasi boshligʻi lavozimidan izzat-ikrom bilan pensiyaga kuzatilgan lavhamiz qahramoni hozirda Olmaliq shahar “Inson” ijtimoiy xizmatlar markazida huquqiy masalalar boʻyicha ekspert-maslahatchi boʻlib faoliyat olib bormoqda.
— Turmush oʻrtogʻim bilan oʻn sakkiz yildan buyon oiladagi barcha muammolarni birgalikda, bamaslahat hal etib kelyapmiz, — deydi oila boshligi. — Balki oilaning mustahkamligi ham shundadir.
- Xonadonlarimiz sarishtalari boʻlmish ayollarga doimo yordam koʻrsatib kelaman, — deydi xotin-qizlar masalalari boʻyicha katta inspektor, podpolkovnik G. Sabriyeva . -Shu sohada xizmat qilayotganimdan cheksiz faxrlanaman.
Xizmati davomida erishgan barcha yutuqlarning sababchisi, avvalo, ustozlari deb biladigan Gulnoza Sabriyevaning oʻzi ham katta leytenant Azamat Akbarov, leytenantlar Soʻgʻdiyona Shodiyeva hamda Omina Zoitova kabi shogirdlarining ustozidir.
Bugungi kunda ikki oʻgʻilni tarbiyalab kelayotgan bu oila sohiblari kelajakda ularning ham oʻzlari kabi el-yurtga nafi tegadigan insonlar boʻlib kamol topishi yoʻlida jonkuyarlik qilib kelayotir. Katta oʻgʻli Javohir tadbirkor, kenjasi Jasur esa huquqshunos boʻlishni diliga tukkan. Biz ham ularning begʻubor orzulari amalga oshishiga tilakdoshmiz.
Mixli SAFAROV, oʻz muxbirimiz.
Toshkent viloyati.