Ichki ishlar vazirligi tasarrufidagi 5-son “Navroʻz” nomli maktabgacha taʼlim tashkiloti toʻliq rekonstruksiya qilinib foydalanishga topshirildi
2024-09-10 11:15:00 / Yangiliklar
Yoshlarga va taʼlimga eʼtibor kelajakka eʼtibor. Bugun mamlakatimizda yoshlar tarbiyasi hamda ularning ilm olishi, kelgusida Vatan taraqqiyoti uchun kamarbasta farzandlarni tarbiyalash davlatimizning muhim ustuvor vazifalaridan biriga aylangan.
Xususan, bu borada maktabgacha bolalarni taʼlimning eng boshlangʻich nuqtasi bilan qamrab olish, ularning dunyoqarashi hamda bilim koʻnikmasini shaklantirish maqsadida Maktabgacha taʼlim tashkilotlari faoliyatini yaxshilash, moddiy texnik bazasini yangilash borasida qator tizimli ishlar amalga oshirilmoqda. Ayni maqsadda Shahrimizning Yakkasaroy tumanida Ichki ishlar vazirligi tasarrufidagi 5-son “Navroʻz” nomli maktabgacha taʼlim tashkiloti toʻliq rekonstruksiya qilinib, zamonaviy jihozlar bilan taʼminlandi.
Muassasaning tantanali ochilish marosimida Ichki ishlar vaziri oʻrinbosari general-mayor Davron Nazarmuxammedov soʻzga chiqib, maktabgacha taʼlim tashkiloti ayni kunda 240 oʻringa moʻljallanib barcha qulaylik hamda sharoitlar yaratilganligi, bu kabi imkoniyatlar tizimda xizmat qilayotgan xodimlarni ijtimoiy qoʻllab quvvatlash maqsadida amalga oshirilayotganligini taʼkidlab, muassasaga damas avtomashinasi hamda bolajonlar uchun sovgʻalar tantanali topshirildi.
Tadbir davomida vazir oʻrinbosari, tizim faxriylari, va mehmonlar mazkur maktabgacha taʼlim tashkilotida yaratilgan sharoit va qulayliklar bilan yaqindan tanishishdi. Zamonaviy bino va xonalar, musiqa va oʻyin maydonchalari, shuningdek, yoʻl harakati maydonchalari ayni kunda bolajonlarning sifatli taʼlim olishi hamda boʻsh vaqtini mazmunli oʻtkazish uchun tashkil etilgan.
Muxtasar aytganda Navroʻz maktabgacha taʼlim tashkiloti bugun zamonaviy qiyofada oʻz bagʻriga bolajonlarni chorlamoqda.