Oʻzbekiston Respublikasi Oliy taʼlim, fan va innovatsiyalar vaziri Kongratbay Sharipov Ichki ishlar vazirligi Akademiyasi magistraturasida taʼlim olayotgan tinglovchilar bilan muloqot qildi
2024-08-24 09:00:00 / Yangiliklar
Tadbirni oʻquv dargohi rahbari Rustam Xatamov ochib, Yangi Oʻzbekistonni barpo etishda taʼlimning oʻrni, barcha sohalar qatori ichki ishlar organlarini yangi avlod kadrlari bilan taʼminlash borasida amalga oshirilayotgan tizimli chora-tadbirlar haqida soʻz yuritdi.
Shundan soʻng Kongratbay Sharipov oliy taʼlim tizimidagi ulkan oʻzgarishlarga toʻxtaldi. Taʼkidlanganidek, inson kapitalini rivojlantirish mamlakatimizda eng ustuvor vazifalardan biri sanaladi.
“Oʻzbekiston – 2030” strategiyasining dastlabki 12 ta maqsadi bevosita taʼlimni isloh qilishga qaratilgan. Shu bilan birga, zamonaviy bilim va yuksak maʼnaviy-axloqiy fazilatlarga ega, mustaqil fikrlaydigan yuqori malakali kadrlar tayyorlash jarayonini sifat jihatidan yangi bosqichga koʻtarish maqsadida Oliy taʼlim tizimini 2030-yilgacha rivojlantirish konsepsiyasi qabul qilingan.
Aytish joizki, sohadagi izchil islohotlar natijasida oxirgi yetti yilda oliy taʼlimga qamrov darajasi 9 foizdan 42 foizga yetkazilib, oliy oʻquv muassasalari soni 200 dan oshirildi.
Bugungi kunda mamlakatimizdagi mavjud 219 ta oliy taʼlim muassasasining 31 tasi xorijiy oliy taʼlim tashkilotlari boʻlsa, 93 tasini nodavlat oliy taʼlim muassasalari tashkil etmoqda.
Taraqqiyotning tamal toshi ilm-fan va taʼlim-tarbiyaga bogʻliq. Shu bois, jahonning yetakchi davlatlari taʼlimni rivojlantirish masalasiga birinchi galdagi vazifa sifatida qarab kelmoqda.
Mamlakatimizda ham yoshlar salohiyatini oshirish, ularning oʻqishi, taʼlim olishi uchun munosib shart-sharoitlar yaratishga davlat siyosatining ustuvor yoʻnalishlari qatorida eʼtibor qaratilmoqda.
Chunki taʼlim sohasini tizimli takomillashtirish orqaligina mamlakatning izchil rivojlanishi va jahon taʼlim hamjamiyatiga muvaffaqiyatli integratsiyalashuvini taʼminlash mumkin, – dedi Kongratbay Sharipov.
Ochiq muloqotda mamlakatimiz taraqqiyotining hozirgi bosqichida ushbu sohada amalga oshirilayotgan islohotlar, taʼlim tizimiga joriy qilinayotgan innovatsion yondashuvlar, bu borada erishilayotgan yutuqlar, sohani rivojlantirishga oid strategik maqsad va vazifalarning pirovard natijalari xususida atroflicha fikr yuritildi.
Shu bilan birga, oliy taʼlim muassasalarida tarbiyaviy ishlarni kuchaytirish, yosh avlodning huquqiy ongi va madaniyatini yuksaltirish orqali yoshlar oʻrtasida huquqbuzarliklarning barvaqt oldini olish, mazkur yoʻnalishda hamkorlikni mustahkamlash, yoshlar bilan manzilli ishlash boʻyicha metodik qoʻllanmalar yaratish masalalariga alohida eʼtibor qaratildi.
Oliy taʼlim, fan va innovatsiyalar vaziri akademiya faoliyatiga toʻxtalar ekan, keyingi yillarda taʼlim maskanida samarali oʻzgarishlar amalga oshirilganini qayd etdi.
Ayniqsa bakalavriat va magistraturadan iborat ikki bosqichli tizimning joriy qilingani, oʻquv jarayonlari mutlaqo yangicha mexanizmlar asosida tashkil qilinayotgani, xalqaro hamkorlik aloqalari va xorijiy tajribalarni oʻrganishga keng yoʻl ochilayotgani ichki ishlar organlari uchun malakali kadrlar tayyorlashga xizmat qilishi taʼkidlandi.
IIV Akademiyasi Axborot xizmati