Isteʼfodagi podpolkovnik Sanʼat Madrahimov ikki yarim yildirki Urganch shahridagi Al-Xorazmiy nomli mahallaga rahbarlik qilmoqda. Mazkur hududda 3 ming 400 nafardan ziyod aholi istiqomat qiladi. Ular 917 ta oilaga jipslashgan holda tinch va osoyishta hayot kechirishyapti. Hududda aholini ijtimoiy-huquqiy himoya qilish, ish bilan taʼminlash, oʻqitish va kasb-hunarga yoʻnaltirish, tadbirkorlikka jalb etish kabi muhim masalalar tegishli tashkilotlar bilan hamkorlikda ijobiy hal etilmoqda.

Qolaversa, aholiga savdo va madaniy-maishiy xizmat koʻrsatish shoxobchalarining, ishlab chiqarish korxonalarining yil sayin koʻpayib borayotgani mahallaning ijtimoiy-iqtisodiy rivojlanishida muhim omil boʻlyapti. Joriy yilning oʻtgan davri mobaynida bevosita mahalla oqsoqolining saʼy-harakatlari bilan hududda 3 ta oilaviy, 2 ta yakka tartibdagi tadbirkorlik faoliyati yoʻlga qoʻyildi. Ijtimoiy foydali mehnat bilan shugʻullanmayotgan 12 nafar fuqaro doimiy va vaqtinchalik ish oʻrniga ega boʻldi. Besh nafar fuqaroga imtiyozli bank krediti ajratildi.

— Yurtimizda boʻlayotgan keng koʻlamdagi bunyodkorlik ishlarida mahallamiz ahlining ham munosib hissasi borligi kishini quvontiradi, — deydi isteʼfodagi podpolkovnik Sanʼat Madrahimov. — Mahallada huquqbuzarliklar profilaktikasi va jinoyatchilikka qarshi kurashish borasidagi ishlarni yanada takomillashtirish, bu borada davlat va nodavlat notijorat tashkilotlari, shuningdek, jamoat uyushmalari bilan hamkorlikdagi ishlarni tizimli ravishda tashkil etish boʻyicha ishlab chiqilgan yoʻl xaritasi asosida jamoat tashkilotlari vakillari bilan hamkorlikda manzilli profilaktik ishlar olib borilmoqda. Natijada ularning turmush tarzida paydo boʻlayotgan muammolar ijobiy hal qilinib, ijtimoiy foydali mehnat jarayonlaridagi ishtiroki taʼminlanmoqda. Bunday xayrli ishlarda profilaktika inspektori, mayor Siroj Shokirov, hokim yordamchisi Xursand Bobojonov, xotin-qizlar faoli Sayyora Bekchanova, yoshlar yetakchisi Tohirjon Aripov hamda mahalla faollaridan Marimboy Rajabov, Gavhar Jumaniyozova, Malika Boltayeva, Muhabbat Rahimovalarning hissasi katta boʻlmoqda. Bunday hamkorlik tufayli hududning ijtimoiy-iqtisodiy rivojlanishi ancha yaxshilanib, jinoyat sodir etilishi keskin kamayishiga erishildi va mahallamiz “yashil hudud” toifasiga kiritildi.

Oʻtgan yil boshidan mahallada raqamli texnologiyalar, kuzatuv kameralaridan samarali foydalanish yoʻlga qoʻyildi. Xususan, mahalladagi ichki koʻchalarning kirish va chiqish joylariga, maktabgacha va maktab taʼlimi muassasalariga, tadbirkorlik subyektlariga, shuningdek, jamoat joylariga kuzatuv kameralari oʻrnatilib, ular profilaktika inspektorining xizmat xonasiga integratsiya qilindi. Amaliyotga joriy qilingan bu yangi tizim mahallaga kelib-ketuvchi shaxslar va transport vositalarini kunning istalgan vaqtida nazorat qilish imkoniyatini yaratdi.

Mustaqillikning 33-yilligini munosib tarzda nishonlash maqsadida “Bir boʻlsak yagona xalqmiz, birlashsak Vatanmiz!” nomli ezgu gʻoya ostida koʻplab madaniy-maʼrifiy tadbirlar, uchrashuvlar, davra suhbatlari oʻtkazilmoqda.

Madrahimovlar oilasini yurtimizda juda yaxshi bilishadi. Lavhamiz qahramonining otasi Ruslan Madrahimov uzoq yillar ichki ishlar organlarida samarali xizmat qilib, polkovnik unvonida pensiyaga chiqqan. Onasi esa Olmaxon Xayitova Oʻzbekiston xalq artisti, el suygan sanʼatkor edi. Sanʼat Madrahimov ana shunday piri badavlat oilaning kenja farzandi. Akasi Furqat ham koʻp yillar mobaynida Toshkent viloyati IIBB tizimida xizmat qilib, mayor unvonida pensiyaga chiqqan. Hozirda Toshkent shahar Mirzo Ulugʻbek tumani Shoʻrtepa MFY raisi.

Qahramonimizning toʻngʻich farzandi Mushtariybegim respublika Antikorrupsiya agentligi masʼul xodimasi, qizi Jahonabegim davlat boshqaruvi va siyosatshunoslik yoʻnalishi boʻyicha Amerika Qoʻshma Shtatlarida tahsil olyapti. Safdor Shohrumon esa ota izidan borib, viloyat IIB JXX JTSB konvoy guruhida xizmat qilmoqda.

Isteʼfodagi podpolkovnik Sanʼat Madrahimovning ichki ishlar organlaridagi xizmat faoliyatini koʻpchilik faxr bilan tilga olishadi. Viloyat IIB Jinoyat qidiruv boshqarmasida, Bogʻot tumani IIB boshligʻining birinchi oʻrinbosari, Yangiariq tumani IIB boshligʻi lavozimlarida xizmat qilgan bu fidoyi inson yurtimiz osoyishtaligini taʼminlashga munosib hissa qoʻshdi. Sodir etilgan koʻplab ogʻir turdagi jinoyatlarni “issiq izida” fosh etish, qidiruvdagi jinoyatchilarni qoʻlga olishda faol ishtirok etdi. Koʻplab yosh xodimlarga kasb sir-asrorlarini qunt bilan oʻrgatib, ustoz degan sharafli nomga muyassar boʻldi.

Ezgu va xayrli ishlar qizgʻin davom etayotgan Al-Xorazmiy nomli mahallani aylanarkanmiz, u yerdagi oʻzgarishlarda ona Vatanimizga fidoyilik bilan xizmat qilayotgan mahalla oqsoqoli, isteʼfodagi podpolkovnik Sanʼat Madrahimovdek himmati baland insonlarning munosib hissasi borligi kishini quvontiradi.

Xudoybergan Jabborov, oʻz muxbirimiz. “Postda”
Xorazm viloyati