Rasmiy sahifalarimizni kuzatib borayotgan boʻlsangiz, viloyatimizning mahallalarida sodir etilgan ogʻir va oʻta ogʻir turdagi jinoyatlarni viloyat hokimi boshchiligida sektor rahbarlari tomonidan tanqidiy muhokama qilish boʻyicha “Buxoro tajribasi” yaratilgan.

Bugun, joriy yilning 5-avgust kuni Buxoro viloyati hokimligidan turib videokonferensaloqa tizimi asosida oʻtkazilgan navbatdagi jinoyatchilikning “mahallabay” muhokamasida viloyat hokimi Botir Zaripov, viloyat prokurori Ulugʻbek Hamdamov, Ichki ishlar boshqarmasi boshligʻi Ikromjon Tursunov boshchiligida huquq-tartibot organlari masʼullari, tuman (shahar) larning sektor rahbarlari, huquqbuzarliklar profilaktikasi va jinoyatchilikka qarshi kurashish boʻyicha viloyat hamda hududiy idoralararo komissiyasiga aʼzo tashkilotlar mutasaddilari, 544 ta mahallalar yettilik vakillari, shuningdek, Buxoro shahri va Gʻijduvon tumanlarining mahallalariga biriktirilgan viloyat Ichki ishlar boshqarmasi sohaviy xizmatlarining rahbarlari ishtirok etishdi.

Tanqidiy-tahliliy tarzda oʻtgan mazkur muhokama yigʻilishida, Buxoro shahrining Bahovuddin Naqshband, Buxoro tumanining Rabotak, Gʻijduvon tumanining Taxtaxon, Peshku tumanining Chibagʻoni hamda Kogon shahrining Arabxona mahallalarida sodir etilgan oʻta ogʻir turdagi jinoyatlarning kelib chiqish sabablari, ularga omil boʻlayotgan shart-sharoitlar birma-bir tahlil qilinib, bu turdagi jinoyatlarni oldini olish borasida amalga oshirilishi lozim boʻlgan profilaktik tadbirlar xususida soʻz yuritildi.

Kriminogen vaziyati ogʻirlashgan ushbu mahallalar masʼullarining hududda jinoyat va huquqbuzarliklarni oldini olish, “Obod va xavfsiz mahalla” tamoyili asosida mahallalarda xavfsiz muhitni yaratish mexanizmlarini belgilash toʻgʻrisida”gi 10-sonli qoʻshma qaror ijrosi yuzasidan amalga oshirgan ishlari boʻyicha hisobotlari tinglanib, masʼullarning yoʻl qoʻygan tizimli kamchiliklari birma bir tanqidiy tahlil qilindi.

Jarayonda, muhokamaga qoʻyilgan ushbu mahallalar masʼullariga, shuningdek, hududiy sektor rahbarlari va boshqa mutasaddilarga nisbatan intizomiy taʼsir choralarini qoʻllash toʻgʻrisida qarorlar qabul qilindi.

Soʻzga chiqqan viloyat IIB boshligʻi Ikromjon Tursunov, Prezidentimizning 2017-yil 14-martdagi “Jinoyatchilikka qarshi kurashish va huquqbuzarlik profilaktikasi tizimini yanada takomillashtirish chora tadbirlari toʻgʻrisida”gi PQ-2833-sonli qarori asosida tashkil etilgan huquqbuzarliklar profilaktikasi va jinoyatchilikka qarshi kurashish boʻyicha viloyat idoralararo komissiyasi subyektlarining yarim yillik ish faoliyatini tanqidiy tahlillar asosida muhokamaga qoʻyib, hisobot davrida qayd etilgan jinoyatlar, ayniqsa oldi olinishi mumkin boʻlgan jinoyatlarning sodir etilishiga imkon bergan har bir holatda komissiyaga aʼzo idoralar masʼullarining javobgarlik masalasini kuchaytirish borasida oʻzining bir qator taklif hamda tavsiyalarini bildirib oʻtdi.

Bundan tashqari, boshqarma boshligʻi tomonidan mazkur idoralararo komissiya” subyektlarining hamkorlikdagi faoliyat samaradorligini oshirish boʻyicha yaratilgan yangi tizim, Ichki ishlar boshqarmasida tashkil etilgan muvofiqlashtirish shtabi faoliyati yuzasidan axborot berdi.

Viloyatda sodir etilayotgan ogʻir va oʻta ogʻir turdagi jinoyatlar, ayniqsa, oila-turmush sohasida sodir etilayotgan huquqbuzarliklar, ularning kelib chiqishiga sabab boʻlayotgan omillar xususida ham soʻz yuritib, kelgusida bunday holatlarni oldini olish maqsadida, mulkchilik shaklidan qatʼiy nazar barcha korxona, tashkilot, muassasalar, mahallalar hamda xonadonlarda “Fuqarobay” tizim asosida manzilli ishlarni olib borish, amalga oshirilayotgan keng qamrovli profilaktik tadbirlarni kuchaytirishga alohida eʼtibor qaratish lozimligini taʼkidlab, birinchi galdagi vazifalar yuzasidan oʻzining bir qator koʻrsatmalarini berdi.

Boshqarma boshligʻi soʻzining davomida voyaga yetmaganlar, yoshlar hamda xotin-qizlar jinoyatchiligiga ham alohida toʻxtalib, jarayonda, surunkali spirtli ichimlik ichishga va giyohvandlikka ruju qoʻygan, ruhiy asab kasalliklar dispanserida roʻyxatda turuvchi shaxslar bilan olib borilishi lozim boʻlgan manzilli ishlarda idoralararo komissiya subyektlarining hamkorlikdagi dolzarb vazifalari boʻyicha oʻzining bir qator takliflarini bildirib oʻtdi.

Navbatdagi soʻzga chiqqan viloyat prokurori Ulugʻbek Hamdamov sektor rahbarlari, taalluqli idoralar masʼullari, nuroniylar, mahalla faollari hamda mahallalar yettilik vakillarining faoliyatidagi oʻzaro munosabatlarda bir birini bogʻlovchi zanjirning uzilganligi, hamkorlikning yoʻqligi yoki yetarli darajada tashkil etilmaganligi, oʻziga yuklatilgan vazifalarning lozim darajada bajarilmaganligi oqibatida mahallalarda ogʻir va oʻta ogʻir turdagi jinoyatlar sodir etilayotganligini taʼkidlab, ushbu jinoyatlarning sabablarini chuqur oʻrganib, oʻz xizmat vazifalarini bajarishda masʼuliyatsizlikka yoʻl qoʻygan har bir masʼul mansabdor shaxsning xatti-harakatlariga huquqiy baho berilishi, har bir qonunbuzilish holati boʻyicha javobgarlikning muqarrarligi taʼminlanishini taʼkidladi.

Muhokama yakunida viloyat hokimi Botir Zaripov tomonidan sektor rahbarlari, idoralararo komissiya subyektlari boʻlgan barcha darajadagi tashkilotlar rahbarlari, mahalla yettilik vakillariga har bir koʻcha, qishloq, ovul va aholi punktlaridagi muammoli oilalarni oʻz vaqtida aniqlash, mahallalarda kambagʻallikni qisqartirish, ishsizlikni kamaytirish, migratsiyada yurib qiynalgan fuqarolarni qaytarish va ularni ish bilan taʼminlash, migratsiyada yurgan fuqarolarning oila aʼzolari, sudda nizolashayotgan yoki nizoli oila sifatida profilaktik hisobga olingan, ajrim yoqasiga kelib qolgan oilalar, probatsiya nazorati ostida turgan, shuningdek, ruhiy asab hamda narkologiya dispanseri roʻyxatida turgan, oilaviy zoʻravonlikka uchragan shaxslar bilan manzilli ishlash borasidagi hamkorlikda vazifalar yuzasidan oʻzining koʻrsatma va topshiriqlarini berdi.

Buxoro tajribasi asosida viloyat sektor rahbarlari tomonidan jinoyatlarning “mahallabay” muhokamasi barcha hududlarda tizimli ravishda amalga oshiriladi.

Buxoro viloyati IIB Axborot xizmati