O‘zbеkiston Rеspublikаsi Ichki ishlаr vаzirligi

Barchamizga maʼlumki, Respublikamizda joriy 2024-yil «Yoshlar va biznesni qoʻllab-quvvatlash yili» deb eʼlon qilingan boʻlib, alohida davlat dasturi ishlab chiqilgan holda yoshlarni ijtimoiy qoʻllab-quvvatlash, bandligini taʼminlash va ular bilan ishlash samaradorligini oshirish maqsadida bir qator ishlar olib borilmoqda.

Oʻzbekiston Respublikasi Xavfsizlik kengashi tomonidan mazkur davlat dasturining ijrosi yuzasidan oʻtkazilgan yigʻilishda ichki ishlar organlariga bir million nafar yoshlar biriktirilib, ular bilan manzilli ishlash vazifasi yuklatilgan edi.

Davlat dasturi hamda ushbu topshiriq ijrosini taʼminlash maqsadida ishlab chiqilgan «Ichki ishlar organlariga biriktirilgan yoshlar bilan ishlash tartibini tashkil etish toʻgʻrisida»gi buyruq talablari asosida Buxoro viloyati 3-sektorlariga qarashli 142 ta mahallalarda istiqomat qiluvchi 7 toifaga kiruvchi jami 46.113 nafar yoshlar roʻyxati shakllantirildi va ular shahar-tuman IIBlarining 142 ta masʼul rahbarlariga biriktirildi.

Ana shu yoshlar orasidan ogʻir toifadagi 5.519 nafar yoshlar ajratib olinib, Oʻzbekiston Respublikasi IIV Akademiyasi oʻqituvchi-murabbiylari va Buxoro viloyati IIB xodimlari hamkorligida «Yangi Oʻzbekistonning vatanparvar yoshlari» shiori ostida bosqichma-bosqich (48 marotaba) viloyat IIB Patrul-post xizmati batalyonida ikki kunlik oʻquv yigʻinlariga jalb etilib, yoshlarni vatanparvarlik ruhida tarbiyalash ishlari olib borildi.

Mazkur oʻquv yigʻinlarining mantiqiy davomi sifatida joriy yilning 23-iyul kunidan boshlab 5 kunlik «Yangi Oʻzbekistonning vatanparvar yoshlari lageri» oʻquv yigʻini tashkil etilib, mazkur oʻquv yigʻiniga 14-16 yosh toifasidagi 100 nafar voyaga yetmaganlar jalb etildi.

Ushbu voyaga yetmaganlar, yosh toifasiga koʻra 25 nafardan 4 guruhga boʻlinib, ular bilan tasdiqlangan oʻquv jadvali va kun tartibi asosida IIV Akademiyasi oʻqituvchi-murabbiylari tomonidan mashgʻulotlar olib borilmoqda.

Bugun, mazkur oʻquv yigʻinlarining borishini koʻzdan kechirish uchun kelgan viloyat IIB boshligʻi podpolkovnik Ikromjon Tursunov bolalar oromgohida yoshlarga taʼlim tarbiya berish bilan bogʻliq oʻquv dasturining borishi, tashkillashtirilgan turli tadbirlar bilan yaqindan tanishdi.

Shu kuni oʻtkazilgan 16 yoshli bolalardan tarkib topgan jamoalar oʻrtasidagi «Zakovat» intellektual oʻyinida ishtirok etib, gʻoliblarni diplom hamda qimmatbaho sovgʻalar bilan taqdirladi.

Jarayonda oʻquv yigʻini doirasida oʻtkazilishi rejalashtirilgan «Yoshlarni vatanparvarlik ruhida tarbiyalashga xizmat qiluvchi filmlar namoyishi», oʻzbek xalqining shonli tarixidagi «Buyuk ajdodlarimizning ibratli hayoti va faoliyatiga oid davra suhbatlari», vatanparvarlikni targʻib qiluvchi «Sport musobaqalari», «Konstitutsiya bilimdoni» viktorinasi kabi tadbirlar yuzasidan oʻzining bir qator tavsiya hamda takliflarini bildirib, oʻquv yigʻinining har tomonlama sifatli va koʻtarinki kayfiyatda oʻtkazilishini taʼminlash borasida masʼullarga koʻrsatma va topshiriqlarini ham berdi.

Mazkur «Yangi Oʻzbekistonning vatanparvar yoshlari lageri» oʻquv yigʻinlari doirasidagi tadbirlar rasmiy sahifalarimizda yoritib boriladi.

Buxoro viloyati IIB Axborot xizmati