O‘zbеkiston Rеspublikаsi Ichki ishlаr vаzirligi

Andijon viloyatida 1 iyuldan 30 iyulga qadar «Kibermadaniyatni yuksaltirish oyligi – «Cyber-month» kompleks targʻibot tadbiri boshlandi.

Shu munosabat bilan Andijon viloyati ichki ishlar boshqarmasida matbuot va OAV vakillari, jurnalistlar va blogerlar, huquqni muhofaza qiluvchi idoralar, korxona va tashkilotlar masʼullari ishtirokida matbuot anjumani oʻtkazildi.

Tadbirda viloyat hokimligi masʼul xodimi Alisher Giyasov, viloyat IIB boshligʻining oʻrinbosari podpolkovnik Jonibek Davronov, Ichki ishlar vazirligi Tezkor qidiruv xizmati Kiberxavfsizlik markazi masʼul xodimi mayor Umidjon Xamraqulovlar mazkur oylikning maqsad va vazifalari, rejalangan ishlar xususida atroflicha maʼlumotlar berishdi.

Shuningdek, Andijon viloyatida kiberjinoyatlarni oldini olish hamda aholini kiber olamdagi tahdidlardan immunitetini oshirish maqsadida IIV Kiberxavfsizlik markazi, viloyatdagi manfaatdor idora va tashkilotlar bilan birgalikda targʻibot-tashviqot tadbirlarini oʻtkazish hamda innovatsion targʻibot usullaridan foydalangan holda barcha ishchi-xizmatchilar, yoshlar bilan hamkorlikda 3 milliondan ortiq aholini qamrab olish rejalashtirilganligi boʻyicha ham maʼlumotlar yetkazildi.

Bundan tashqari, joylarda mobil targʻibotlar bilan birga «Eng faol mahalla», «Internet tarmogʻidan xavfsiz foydalanaman», «Firibgarlardan ehtiyot boʻling», «Eng yaxshi milliy kontent» kabi yoʻnalishlarda tanlovlar, IT sohasida onlayn olimpiadalar, kibertahdidlardan himoyalanish boʻyicha oʻquv kurslari, sektorlar rahbarlarining fuqarolar bilan uchrashuvlar tashkil etish koʻzda tutilganligi aytib oʻtildi.

Matbuot anjumanida kiberjinoyatchilarning aldoviga ishonib jabrlangan fuqarolar oʻz kechmishlarini bayon etishdi. Matbuot va ommaviy axborot vositalari vakillari mutaxassislardan oʻzlarini qiziqtirgan barcha savollariga javoblar olishdi.

Andijon viloyati IIB Axborot xizmati