Namangan viloyati IIBda navbatchilik qismi va “102” xizmati xodimlari uchun oʻquv mashgʻuloti oʻtkazildi
2024-06-23 09:00:00 / Yangiliklar
Ichki ishlar organlarida navbatchilik qismi va “102” xizmati xodimlarining oʻrni muhim ahamiyatga ega boʻlib, unda huquq va manfaatlari buzilgan fuqarolar tomonidan kelib tushayotgan murojaatlar, shuningdek, jinoyat yoki huquqbuzarliklar haqidagi xabarlar yuzasidan zudlikda tegishli chora-tadbirlar belgilash asosiy vazifa sifatida belgilab berilgan.
Bugun Namangan viloyati IIB boshligʻi polkovnik Shuxrat Aliyev rahbarligida oʻtkazilgan oʻquv mashgʻulotida boshqarma boshligʻi oʻrinbosarlari, sohaviy xizmat rahbarlari, viloyat va barcha shahar-tumanlar IIBlarining Navbatchilik qismlari, “102” xizmati hamda boshqa masʼul xodimlari ishtirok etib, mazkur yoʻnalishda yoʻl qoʻyilayotgan kamchiliklar muhokama qilindi hamda kelgusida ularni bartaraf etish va ishni toʻgʻri tashkil qilish yuzasidan tegishli vazifalar belgilab berildi.
Oʻquv mashgʻuloti davomida xizmat intizomi va qonunchilikka amal qilish ahvoli chuqur tahlil qilinib, xodimlar oʻrtasida salbiy holatlar sodir etilishining oldini olish maqsadida tegishli chora-tadbirlarni belgilash, Ichki ishlar organlariga kelib tushayotgan har bir murojaat va xabarlar boʻyicha zudlikda tergov-tezkor guruhlarini hamda boshqa masʼul xodimlarning hodisa sodir etilgan joyga yetib borishlarini taʼminlash, xodimlar yurituvdagi hujjatlar yuzasidan oʻz muddatida qonuniy qaror qabul qilinishini doimiy nazorat qilib borish hamda oʻz xizmat vazifalarini belgilangan tartibda amalga oshirishlari yuzasidan masʼul rahbarlarga aniq topshiriqlar berildi.
Namangan viloyati IIB Axborot xizmati