Namangan viloyati IIB tashabbusi bilan “Rahbar va yoshlar uchrashuvi” oʻtkazildi
2024-06-21 11:50:00 / Yangiliklar
Joriy yilning iyun oyi “Yoshlar oyligi” deb belgilanib, respublikamizning barcha hududlarida, shuningdek, Namangan viloyatida ham “Yangi Oʻzbekiston yoshlari, birlashaylik!” shiori ostida keng qamrovli madaniy-maʼrifiy tadbirlar oʻtkazilib kelinmoqda.
“Yoshlar oyligi” doirasida Namangan viloyati IIB boshligʻi, 3-sektor rahbari polkovnik Shuxrat Aliyev tomonidan ham viloyat yoshlarining muammoli murojaatlarini oʻrganish va ularga ijobiy yechim topish maqsadida muntazam ravishda sayyor qabullar, uchrashuv hamda ochiq muloqotlar tashkil qilinmoqda.
Navbatdagi “Rahbar va yoshlar uchrashuvi” Davlatobod tumanida joylashgan Namangan muhandislik-texnologiya institutida tashkil etilib, unda viloyatning 14 ta shahar-tumanidan 200 nafardan ortiq yigit-qiz va ularga biriktirilgan rahbarlar ishtirok etishdi.
Dastlab, boshqarma boshligʻi bugungi kunda yoshlarning taʼlim olish, sport bilan shugʻullanishi, zamonaviy bilimlarni oʻzlashtirishi uchun mamlakatimizda barcha sharoitlar mavjudligi, yaratilayotgan imkoniyatlardan oqilona foydalanayotgan yigit-qizlar bugun Oʻzbekiston nomini dunyoga tanitishda katta hissa qoʻshib kelayotganini alohida eʼtirof etdi.
Samimiy muloqot tarzida kechgan uchrashuvda yoshlar tomonidan bildirilgan murojaatlar, yechimini kutayotgan masalalar ham eʼtibordan chetda qolmadi. Turli masalalardagi murojaatlarning barchasi qabul qilinib, ularning aksariyati joyning oʻzida hal etildi. Ayrimlari esa masʼullarga biriktirilib, ijrosi alohida nazoratga olindi.
Madaniyat va sanʼat vakillari tomonidan Vatanni madh etuvchi, yoshlikni yodga soluvchi kuy-qoʻshiqlar uchrashuvga yanada koʻtarinkilik baxsh etib, yigʻilganlarga yuqori kayfiyat ulashdi.
Uchrashuv yakunida tengdoshlariga oʻrnak va namuna boʻlib kelayotgan bir guruh yoshlarga boshqarma boshligʻi tomonidan esdalik va qimmatbaho sovgʻalar topshirildi.
Namangan viloyati IIB Axborot xizmati