IIV Surxondaryo Akademik litseyida tantanali diplom topshirish marosimi boʻlib oʻtdi
2024-06-17 10:00:00 / Yangiliklar
Joriy yilning 15-iyun kuni Oʻzbekiston Respublikasi Ichki ishlar vazirligi Surxondaryo akademik litseyida taʼlim va tarbiya olib, oʻzida ichki ishlar organlari xodimlari uchun zarur boʻlgan dastlabki kasbiy bilim, yuksak vatanparvarlik va maʼnaviy-axloqiy fazilatlarni shakllantirgan, kelgusida Vatanimiz ravnaqi, yurt tinchligi osoyishtaligiga oʻzining, chinakam hissasini qoʻshadigan 156 nafar oʻquvchi yoshlarning bitiruv tadbiri boʻlib oʻtdi.
Ushbu tadbirda Surxondaryo viloyati IIB boshligʻi polkovnik Timur Ismailov, viloyat IIB boshligʻi oʻrinbosarlari, viloyat IIB Faxriylar kengashi aʼzolari, tuman hokimligi va Ichki ishlar boʻlimi masʼullari, bitiruvchi yoshlarning ota-onalari ishtirok etishdi.
Tantanali tadbirda soʻz olgan viloyat IIB boshligʻi taʼlim dargohini bitirayotgan oʻquvchi yoshlarning olgan bilimlari orqasidan erishgan yutuqlari haqida soʻz yuritib, ularning kelgusidagi ishlariga omadlar tiladi.
Shundan soʻng tadbirning asosiy qismi bitiruvchi oʻquvchilarga diplomlarni topshirish marosimi boʻlib oʻtdi.
Tantanali diplom topshirish marosimida viloyat IIB boshligʻi va boshqarma boshligʻi oʻrinbosarlari, Faxriylar kengashi rahbarlari va aʼzolari qoʻlidan diplomlarni olish jarayonida har bir oʻquvchi oʻgʻil-qiz gʻurur va iftixor bilan «Oʻzbekiston Respublikasiga sadoqat bilan xizmat qilaman!»- deya, Ona vataniga oʻz sadoqatini namoyon etishdi.
Tantanali tadbir davomida, soʻz olganlar ushbu taʼlim dargohi va bitiruvchi oʻquvchilari haqida oʻzlarining iliq fikrlarini bildirishdi.
Tadbir soʻngida, IIV Surxondaryo Akademik litsey oʻquvchi oʻgʻil-qizlari tantanavor yurishga saf tortishib, rahbarlar oldidan oʻzgacha hayajon, oʻzgacha quvonch va viqor bilan safdan oʻtishdi.
Surxondaryo viloyati IIB Axborot xizmati