Namangan viloyati Kosonsoy tumanida “Biz giyohvandlikka qarshimiz!” yoshlar festivali va viloyat rahbarlarining ochiq muloqoti oʻtkazildi
2026-02-19 13:30:00 / Yangiliklar
Kosonsoy tumanida “Biz giyohvandlikka qarshimiz!” shiori ostida keng koʻlamli yoshlar festivali hamda viloyat rahbarlarining yoshlar bilan ochiq muloqoti tashkil etildi.
Tadbirlar avvalida tumanning “M.Aʼzam” mahallasida joylashgan sport maktabida yoshlar festivali boʻlib oʻtdi. Unda Shavkatjon Abdurazzoqov boshchiligida viloyat huquqni muhofaza qiluvchi organlar rahbarlari, davlat va jamoat tashkilotlari masʼullari hamda keng jamoatchilik vakillari ishtirok etdilar.
Soʻzga chiqqanlar mamlakatimizda yoshlar siyosati sohasida amalga oshirilayotgan islohotlar, yoshlarga yaratilayotgan imkoniyatlar, ularning bandligini taʼminlash, boʻsh vaqtini mazmunli tashkil etish va turli salbiy illatlardan, xususan giyohvandlikdan asrash borasida olib borilayotgan tizimli ishlar haqida atroflicha toʻxtalib oʻtdilar.
Festival doirasida “Yoshlar mehnat yarmarkasi” tashkil etilib, boʻsh ish oʻrinlari taklif qilindi. Shuningdek, rasmlar tanlovi, kitoblar yarmarkasi, konsert dasturi, harbiy xizmatchilarning koʻrgazmali chiqishlari, harbiy texnika va qurol-aslahalar koʻrgazmasi namoyish etildi. Nogironligi boʻlgan shaxslar tomonidan ishlab chiqarilgan mahsulotlar koʻrgazmasi va savdosi ham yoʻlga qoʻyildi.
Bundan tashqari, “Zakovat” intellektual oʻyini, shaxmat, futbol, voleybol, boks, kurash, stol tennisi, armrestling, kamondan oʻq otish musobaqalari, milliy xalq oʻyinlari hamda “Osh chempionati” oʻtkazilib, gʻolib va sovrindorlar diplom va esdalik sovgʻalari bilan taqdirlandilar.
Festival doirasida tumanning “Bogʻibaland” mahallasida joylashgan ixtisoslashtirilgan maktabda viloyat rahbarlarining yoshlar bilan ochiq muloqoti ham tashkil etildi. Unda 100 nafarga yaqin yoshlar ishtirok etib, oʻzlarini qiziqtirayotgan masalalar, taklif va tashabbuslari yuzasidan murojaat qildilar.
Xususan, bandlikni taʼminlash, tadbirkorlikni yoʻlga qoʻyish, ichki ishlar organlarida xizmat qilish, dehqonchilik uchun yer ajratish, tikuv mashinalari xaridi uchun imtiyozli kredit olish hamda oliy taʼlim muassasalarida kontrakt toʻlovlarini amalga oshirish kabi masalalar muhokama qilindi. Ichki ishlar organlarida xizmat qilish istagini bildirgan yoshlarga qabul tartibi va qoʻyiladigan talablar boʻyicha batafsil tushuntirishlar berildi.
Samimiy va ochiq muloqot ruhida oʻtgan tadbirlar yoshlarning faolligini oshirish, ularni sogʻlom turmush tarziga yoʻnaltirish hamda jamiyat hayotidagi ishtirokiga yanada keng imkoniyat yaratishga xizmat qildi.
Namangan viloyati IIB Axborot xizmati