O‘zbеkiston Rеspublikаsi Ichki ishlаr vаzirligi

Yurtimizda koʻplab sohalarda amalga oshirilayotgan islohotlar, jumladan inson huquqlarini taʼminlash, jinoyatlarning oldini olish, aholi farovonligini taʼminlash kabi saʼy-harakatlar dunyo xalqlari eʼtirofini qozonib kelmoqda. Qoʻshni davlatlar bilan ham qardoshlik, doʻstlik, hamkorlik aloqalarimiz tobora mustahkamlanib boryapti. Iqtisodiyot, madaniyat, sanʼat, taʼlim va boshqa bir qancha yoʻnalishlarda hamkorlik yoʻlga qoʻyilgani xalqimizning dunyo sahnasida oʻzini namoyon etishida muhim omil boʻladi. Bu kabi jarayonlar ichki ishlar organlari, xususan jazoni ijro etish tizimida ham juda yaxshi yoʻlga qoʻyilgan.

Oʻtgan yili Oʻzbekiston Respublikasi IIV huzuridagi Jazoni ijro etish departamentiga Belarus delegatsiyasining tashrifi amalga oshirilgan edi. Mehmonlar sohada qilingan ishlar bilan tanishib, yuksak baholagani haqida aytgandik. Joriy yilning 2-6-iyun kunlari esa qoʻshni Qirgʻiziston Respublikasi Adliya vazirligi huzuridagi Jazoni ijro etish xizmati raisi Askat Egemberdiyev boshchiligidagi delegatsiya yurtimizga tashrif buyurib, JIED faoliyati bilan tanishdi. Delegatsiya aʼzolari Departamentning yangi binosida yaratilgan imkoniyatlar, navbatchilik qismi, sport zallari, kutubxona, oshxona, jismoniy va jangovar tayyorgarlik xonasi va boshqa shart-sharoitlar bilan tanishtirildi.

Departament majlislar zalida boʻlib oʻtgan uchrashuvda esa, Jazoni ijro etish departamenti boshligʻi, polkovnik Rustam Tursunov mehmonlar bilan suhbatlashib, yurtimizda inson huquqlarini taʼminlash, jazoni ijro etish joylaridagi shaxslarga foydali hunarlar oʻrgatish, ozodlikka tayyorlash kabi masalalar haqida maʼlumotlar berdi. Shuningdek, ishlab chiqarish yoʻnalishida amalga oshirilayotgan ishlar, bogʻdorchilik, chorvachilik kabi yoʻnalishlarga ham toʻxtalib oʻtildi.

Shundan soʻng mehmonlar Birinchi mintaqaviy hudud 24-son Tarbiya koloniyasida boʻlib, u yerdagi voyaga yetmagan tarbiyalanuvchilarga yaratilgan sharoitlar, muassasa qoshidagi maktab filiali, kasb-hunarga oʻqitish markazini koʻzdan kechirishdi. Muassasada amalga oshirilgan ishlar, maʼnaviy-maʼrifiy tadbirlar, ilmga, kasb-hunarga koʻrsatilayotgan yuksak eʼtiborni eʼtirof etdilar.

Shuningdek, delegatsiya Birinchi mintaqaviy hudud 42-son Manzil koloniyasida ham boʻlib, ishlab chiqarish faoliyati bilan yaqindan tanishdilar. Muassasa rahbarlari bilan ham suhbatlashib, yoʻlga qoʻyilgan ustoz-shogird anʼanalari, tikuvchilik sexi, chorvachilik, bogʻdorchilik kabi yoʻnalishlarda amalga oshirilayotgan ishlarni yuqori baholadi. Ayniqsa chorvachilik fermasidagi zamonaviy texnologiyalar, nasldor qoramollar, mahkumlarning ish bilan taʼminlanganligi va yaratilgan shart-sharoitlarga eʼtibor qaratdi.

Tashrif davomida birinchi mintaqaviy hudud 13-son JIEK, Uchinchi Mintaqaviy hududning Samarqand viloyatida joylashgan 38-son Manzil koloniyasi bilan ham tanishdilar. Xodimlarning xizmat faoliyati, kasbiy tajribasi, mahkumlarni tarbiyalash borasidagi ishlar eʼtirof etildi.

Delegatsiya aʼzolari tashrif davomida yurtimizdagi muqaddas qadamjolar, tarixiy obidalar va eʼtiborga molik boshqa majmualarni ham sayohat qilishdi. Jumladan poytaxtimizdagi «Gʻalaba bogʻi»dagi suronli yillarda yurtimiz boshidan kechirgan kunlarni aks ettiruvchi eksponatlar, Oʻzbekistonning gʻalabaga qoʻshgan hissasini aks ettiruvchi suratlar va boshqa koʻrgazmalar bilan tanishdi. Samarqand viloyatida esa «Shohi zinda», «Goʻri Amir», majmualari hamda «Bibixonim» maqbarasi, «Ulugʻbek rasadxonasi», «Boqiy Samarqand» kabi eʼtiborga molik obyektlarimizda boʻlib, koʻhna qadriyatlarimiz, urf-odat va anʼanalarimiz bilan tanishish imkoniga muvaffaq boʻldilar.

Tadbir soʻnggida Delegatsiya aʼzolari Jazoni ijro etish tizimida amalga oshirilgan ishlar va kelgusi rejalar haqida suhbatlashib, oʻzaro tajribalari bilan oʻrtoqlashdilar. Shuningdek, mahkumlarni tarbiyalash, jinoyatlarning oldini olish, xodimlar tajribasini oshirish kabi xizmat samaradorligi uchun muhim boʻlgan jihatlarda hamkorlikni yanada mustahkamlashga kelishib olindi. Ayni masalalar yuzasida ikki davlat vakillari oʻrtasida memorandum imzolandi.