Faxriylar – faxrimiz. Hamon kuch-gʻayratga toʻla
2024-06-06 12:20:00 / Yangiliklar
Omonboy Mamasoliyev serfarzand oilada voyaga yetgan. Otasi Mamasoli aka butun umr qishloq xoʻjaligi sohasida mehnat qilgan, onasi Hoshiyaxon opa uy-roʻzgʻor ishlari va farzandlar tarbiyasi bilan shugʻullangan.
Omonboy Andijon pedagogika institutini bitirgach, qishloq maktabida oʻqituvchi boʻlib ishladi. Muddatli harbiy xizmatni oʻtash chogʻida kichik ofitserlar tarkibini tayyorlash boʻyicha qisqa muddatli kurslarni tamomlab, leytenant unvoni bilan zaxiraga boʻshatildi.
1968-yilda O. Mamasoliyev qalb amri bilan ichki ishlar organlari safiga kirib, Andijon viloyati IIB shaxsiy tarkib bilan ishlash xizmati inspektori, katta inspektori sifatida faoliyat olib bordi. Xizmatdan ayrilmagan holda, IIV Toshkent oliy maktabini tamomlab, 10-yildan ortiq viloyat IIB Qoʻriqlash boʻlimi boshligʻi lavozimida xizmat qildi. Keyinchalik Andijon viloyati IIBda turli masʼuliyatli rahbarlik lavozimlarida faoliyat olib bordi va 1994-yilda polkovnik unvoni bilan isteʼfoga chiqdi.
Qariyb oltmish yil birga yashagan rafiqasi Zinnatxon opa bilan besh farzandni voyaga yetkazib, oliy maʼlumotli boʻlishlarida qoʻl-qanot boʻlishdi. Toʻngʻich oʻgʻli Ulugʻbek qishloq xoʻjaligi sohasida, Islombek esa ichki ishlar organlarida xizmat qilib, mayor unvonida isteʼfoga chiqdi.
Qizlari Feruzaxon va Dilfuzaxon maktabda yosh avlodga taʼlim-tarbiya berib kelmoqda.
Isteʼfodan soʻng qahramonimiz uyida bekor oʻtira olmadi. Oʻn yildan ortiq vaqt davomida Jalaquduq tumanidagi «Omonlik» fermer xoʻjaligiga rahbarlik qildi, bu xoʻjalik paxta va gʻalladan yuqori hosil olib mashhur boʻlgan. Soʻnggi paytlarda Omonboy aka nabiralar tarbiyasi bilan mashgʻul.
Andijon viloyati ichki ishlar organlari tarixiga ismlari zarhal harflar bilan bitilgan general mayorlar Muxtor Sultonov, Gʻafur Rahimov, polkovniklar A. Xatipov, S. Qoʻchqorov va O. Rahimovlar bilan xizmat qilish sharafiga muyassar boʻlganman.
Shuningdek, shogirdlarim polkovniklar A. Sobirov, B. Toshmatov, U. Abdurazzoqovlar bilan faxrlanaman.
Lavhamiz qahramoni bugun ham kuch-gʻayratga toʻla. U viloyat IIB boʻlinmalarining doimiy mehmoni. Yosh xodimlar bilan uchrashuvlarda qatnashib, ularga xizmat yillari haqida soʻzlab beradi, hayotiy tajribasi bilan oʻrtoqlashadi va xizmat burchini halol va vijdonan bajarishga undaydi.
Boris Kleyman, oʻz muxbirimiz. «Postda»
Andijon viloyati