Toshkent shahar IIBBda “Rahbar va yoshlar uchrashuvi” tadbiri oʻtkazildi
2026-02-12 10:00:00 / Yangiliklar
Yosh xodimlarni vatanparvarlik, ajdodlar merosi, qadriyatlarimizga hurmat, kasbiga, burchiga sadoqat ruhida tarbiyalash masʼuliyatli hamda sharafli ish.
Ichki ishlar organlari xizmatiga ilk qadam qoʻygan yoshlarni qoʻllab-quvvatlash, toʻgʻri yoʻllanma berish orqali kasbga yoʻnaltirilishi xizmat samaradorligini taʼminlash, ish faoliyatida yuqori natijalar koʻrsatishida muhim ahamiyatga ega.
Shu maqsadlarda Toshkent shahar Ichki ishlar bosh boshqarmasi apparati, hududiy tuzilmalari sohaviy xizmatlarida xizmat olib borayotgan yosh xodimlar, ularning ota-onalari ishtirokida “Rahbar va yoshlar uchrashuvi” tadbiri tashkillashtirildi.
Tadbirda Bosh boshqarma boshligʻi, polkovnik Ravshan Sultanxodjayev hamda uning maslahatchisi, isteʼfodagi polkovnik Murod Karimov ishtirok etdi.
Yigʻilganlar oldida soʻzga chiqqan Ravshan Sultanxodjayev yoshlar masalalari davlat siyosati darajasida ekanligi, mamlakatimizda yoshlarga yaratilayotgan shart-sharoitlar, oʻz isteʼdodi va imkoniyatlari, salohiyati, hayotiy quvvatlarini namoyon etishlari uchun berilayotgan imtiyozlarga toʻxtaldi.
Shuningdek, yurtimizda tinchlik-osoyishtalikni saqlash, jinoyatchilikka qarshi kurash, huquqbuzarliklarning oldini olishdek sharafli va masʼuliyatli ishga bel bogʻlagan yoshlar uchun ichki ishlar organlarida amalga oshirilayotgan ijobiy ishlar taʼkidlab oʻtildi.
Yoshlardan kasbiga sadoqat, fuqarolar bilan xushmuomalalik, xizmat vazifalarini sidqidildan bajarish, ichki ishlar organlari xodimi degan sharafli nomga dogʻ tushirmaslik talab etilishi qayd etildi.
Shu bilan birga poytaxt ichki ishlar organlari safida xizmat vazifalarini bajarish qatorida professional sport bilan shugʻullanib yurtimiz sharafini munosib himoya qilib kelayotgan, ilm-fan rivojiga katta hissa qoʻshayotgan, sanʼat sohasida nufuzli mukofotlarni qoʻlga kiritib kelayotgan yoshlar nomlari qayd etilib bir guruh yoshlarga tashakkurnoma, faxriy yorliqlar hamda pul mukofotlari, sidqidildan mehnat qilib tengdoshlariga namuna boʻlayotgan bir guruh yoshlarning ota-onalariga tashakkurnomalar topshirildi.
Ochiq muloqot ruhida oʻtkazilgan tadbirda polkovnik Ravshan Sultanxodjayev yigʻilish ishtirokchilari bilan samimiy suhbatlashib, ularning muammolari, xizmat faoliyati hamda ijtimoiy mavzulardagi muammolariga qiziqdi.
Xizmat faoliyatini yanada yaxshilash, Prezidentimiz tomonidan qabul qilinayotgan qarorlar ijrosiga yangicha yondashuv hamda xizmat samaradorligini oshirish boʻyicha ishtirokchilarning fikr-mulohazalarini tingladi hamda ularning turli mavzulardagi savollariga javoblar berdi.
Tadbir xizmat bilan birga sanʼat yoʻnalishida ham faoliyat olib borayotgan bir guruh isteʼdodli yoshlarning kuy-qoʻshiqlari bilan davom ettirildi.
Toshkent shahar IIBB Axborot xizmati