IIV Akademiyasi magistratura tinglovchilari Ozarbayjonda xorijiy tajribani oʻrgandilar
2026-02-12 10:00:00 / Yangiliklar
Magistratura tinglovchilari xorij tajribasini oʻrganish maqsadida Boku shahrida boʻldi. Xizmat safari Oʻzbekiston va Ozarbayjon Ichki ishlar vazirliklari oʻrtasidagi ikki tomonlama manfaatli hamkorlik doirasida tashkil qilindi.
Tinglovchilar “Xavfsiz shahar” markazi, Tezkor harakatlanuvchi kuchlar polki, Transportni intellektual boshqarish markazi faoliyatini oʻrganib, jamoat xavfsizligini taʼminlash, kriminogen xavf-xatarlarni oldini olish, ommaviy tartibsizliklar paytida kuch-vositalarni boshqarish, yoʻllarda harakat xavfsizligini taʼminlash maqsadida amaliyotga joriy qilingan innovatsion tizim hamda yondashuvlar bilan tanishdilar.
Bundan tashqari, Ozarbayjon IIV Akademiyasining tajribali professor-oʻqituvchilar tomonidan “Ichki ishlar organlarining jamoat tartibini saqlash xizmatlari faoliyatini boshqarishning huquqiy va taktik asoslari”, “Jinoyatchilikka qarshi kurashishda tezkor texnik vositalarni qoʻllashning taktik asoslari”, “Ommaviy tadbirlarni oʻtkazishda jamoat xavfsizligini taʼminlashning tashkiliy va taktik asoslari”, “Kiberjinoyatlarga qarshi kurashishni tashkil etish” mavzularida oʻquv mashgʻulotlari tashkil qilindi.
Mashgʻulotlar yakunida tinglovchilarga sertifikatlar topshirildi. Muhimi, xorij safari davomida oʻrganilgan ilgʻor jihatlar tinglovchilarning zamonaviy bilim va koʻnikmalarini mustahkamlashga xizmat qildi.
IIV Akademiyasi Axborot xizmati