Ichki ishlar vazirligi tomonidan Alisher Navoiy tavalludining 585-yilligi munosabati bilan maʼnaviy-maʼrifiy tadbir oʻtkazildi
2026-02-09 11:00:00 / Yangiliklar
Ichki ishlar vazirligi Maʼnaviy-maʼrifiy ishlar va kadrlar bilan taʼminlash departamenti Maʼnaviy-maʼrifiy ishlar xizmati tashabbusi bilan, Ichki ishlar organlari yosh xodimlari ishtirokida Oʻzbek xalqining buyuk farzandi, jahon adabiyotining mutafakkir siymosi — Alisher Navoiy tavalludining 585-yilligiga bagʻishlangan maʼnaviy-maʼrifiy tadbir oʻtkazildi.
Tadbirda Ichki ishlar organlari tizimida faoliyat olib borayotgan yosh xodimlar, maʼnaviy-maʼrifiy ishlar xizmati masʼullari hamda soha mutaxassislari ishtirok etdilar.
Yigʻilish davomida Alisher Navoiyning hayot yoʻli, davlat va jamiyat oldidagi xizmatlari, turkiy til va adabiyot taraqqiyotiga qoʻshgan beqiyos hissasi haqida atroflicha fikr-mulohazalar bildirildi.
Tadbir davomida Navoiy asarlarida aks etgan insonparvarlik, adolat, vatanga muhabbat, komil inson gʻoyalari bugungi kunda Ichki ishlar organlari xodimlari faoliyatida ham muhim ahamiyat kasb etishi alohida taʼkidlandi.
Shuningdek, yosh xodimlar tomonidan buyuk shoirning gʻazallaridan namunalar ifodali oʻqildi, asarlari mazmuni yuzasidan maʼnaviy-maʼrifiy tahlillar qilindi.
Tadbir ishtirokchilari Alisher Navoiy merosini oʻrganish va uning gʻoyalarini hayotga tatbiq etish yosh avlod, ayniqsa, huquq-tartibot sohasida xizmat qilayotgan xodimlar uchun muhim maʼnaviy tayanch ekanini qayd etdilar.
Bu kabi maʼrifiy tadbirlar buyuk mutafakkir Alisher Navoiyning boy adabiy-maʼnaviy merosini keng targʻib etish, yosh xodimlar ongida milliy gʻurur, vatanparvarlik, maʼnaviy poklik va kitobxonlik madaniyatini yanada yuksaltirishga xizmat qiladi.