Buxoro viloyati IIB rahbariyati tomonidan otaliqqa olingan va uyushmagan yoshlar bilan ochiq muloqot oʻtkazildi
2026-01-23 09:00:00 / Yangiliklar
Buxoro shahrida Buxoro viloyati huquqni muhofaza qiluvchi organlar rahbarlari, viloyat Ichki ishlar boshqarmasi boshligʻi hamda viloyat Yoshlar ishlari agentligi rahbari ishtirokida otaliqqa olingan va uyushmagan yoshlar bilan ochiq va samimiy uchrashuv boʻlib oʻtdi.
Uchrashuvdan koʻzlangan asosiy maqsad — yoshlarning kundalik hayoti, taʼlim olish jarayonlari, kasb-hunarga boʻlgan qiziqishlari, shuningdek, ularni qiynayotgan muammo va takliflarni bevosita joyida oʻrganishdan iborat boʻldi.
Muloqot davomida har bir yoshning fikri diqqat bilan tinglanib, ularning ijtimoiy moslashuvi va kelajagiga daxldor masalalar muhokama qilindi.
Shuningdek, yoshlarning bandligini taʼminlash, ularni doimiy ish oʻrinlari va kasb-hunar yoʻnalishlariga jalb etish, sogʻlom turmush tarzini shakllantirish, sport va maʼnaviy-maʼrifiy tadbirlarda faol ishtirokini kengaytirish, huquqiy madaniyatini yuksaltirishga qaratilgan chora-tadbirlar yuzasidan aniq taklif va tavsiyalar bildirildi.
Uchrashuv davomida yoshlar tomonidan koʻtarilgan har bir masala masʼullar ishtirokida atroflicha oʻrganilib, ularni hal etish boʻyicha yoshlarga biriktirilgan rahbarlar hamda mutasaddi tashkilotlarga tegishli koʻrsatma va topshiriqlar berildi.
Mazkur masalalarning ijrosi alohida nazoratga olinishi taʼkidlandi.
Mazkur uchrashuvda jami 40 nafardan ziyod yoshlar hamda 120 nafarga yaqin uyushmagan yoshlar ishtirok etdi. Ular tomonidan jami 46 ta muammo va murojaat bildirilib, har bir murojaat boʻyicha manzilli yechimlar belgilandi.
Uchrashuv yakunida bir qator yoshlar kitoblar jamlanmasi bilan ragʻbatlantirilib, ularning bilimga boʻlgan qiziqishini oshirish hamda maʼnaviy dunyosini boyitishga alohida eʼtibor qaratildi.
Buxoro viloyati IIB Axborot xizmati