O‘zbеkiston Rеspublikаsi Ichki ishlаr vаzirligi

Toshkent viloyati Ichki ishlar bosh boshqarmasida IIBB boshligʻi, polkovnik Abduvosit Abdurazakov boshchiligida yosh xodimlar bilan ochiq muloqot tarzidagi uchrashuv boʻlib oʻtdi.

Uchrashuv avvalida boshqarma boshligʻi tizimda yosh xodimlarga qaratilayotgan eʼtibor, ular uchun yaratilayotgan shart-sharoitlar, mavjud imkoniyatlar bilan bir qatorda, faoliyat davomida uchrayotgan ayrim muammolar va kamchiliklar xususida ham toʻxtalib oʻtdi.

Shuningdek, mazkur kamchiliklarni bartaraf etish boʻyicha amalga oshirilayotgan chora-tadbirlar hamda xizmat samaradorligini oshirishda yosh xodimlarning faolligi muhim ekanini alohida taʼkidladi.

Ochiq muloqot jarayonida yosh xodimlar oʻzlarini qiziqtirgan savollarga bevosita javob olish, shuningdek, xizmatni yanada takomillashtirishga qaratilgan tashabbus va takliflarini bildirish imkoniga ega boʻldi.

Bildirilgan masalalar yuzasidan masʼullarga tegishli topshiriqlar berildi. Shu bilan birga, ayrim takliflar boʻyicha ijro muddatlari va nazorat mexanizmlarini yanada aniqlashtirish zarurligi qayd etildi.

Tadbirda IIBB boshligʻi maslahatchisi, isteʼfodagi general mayor Sayfulla Asadov ham soʻzga chiqib, oʻzining boy xizmat tajribasi, kasbiy faoliyat davomida orttirgan saboqlari bilan oʻrtoqlashdi.

U yoshlarga vatanparvarlik, kasbga sadoqat, xizmat jarayonidagi sinov va masʼuliyatlarga bardoshli boʻlish zarurligi haqida hayotiy misollar orqali tushuntirish berdi.

Uchrashuv yakunida xizmat faoliyatida yuqori natijalarga erishib kelayotgan bir guruh yosh xodimlar munosib mukofotlandi.

Umuman olganda, mazkur ochiq muloqot uchrashuvi yosh xodimlarning kasbiy rivojiga koʻmaklashish, ularning masʼuliyatini oshirish hamda tizimda ochiqlik va sogʻlom muloqotni mustahkamlashga xizmat qildi.

Kelgusida bunday uchrashuvlarni muntazam va aniq ijro nazorati asosida tashkil etish yoshlar bilan ishlash samaradorligini yanada oshirishi bilan ahamiyatlidir.

Toshkent viloyati IIBB Axborot xizmati