Oʻgʻlonlarin unutmas Vatan! Ismi jismiga mos edi
2026-01-21 23:00:00 / Yangiliklar
“Jasur”, “jasoratli” soʻzlari “xavf-xatardan, qiyinchiliklardan qoʻrqmaydigan, dovyurak” degan maʼnolarni anglatadi. Jasurjon Muhammadov oilada toʻrt oʻgʻilning sarvari sifatida ukalariga sardor, yetakchi boʻlib, ismi jismiga mosligini butun hayot yoʻli mobaynida isbotladi. U bolaligidan ichki ishlar organi xodimi boʻlishni orzu qilardi.
Ushbu tizimdagi ilk faoliyatini qoʻriqlash xizmatida boshladi. Keyinchalik Navoiy viloyati IIB YHXB Yoʻl-patrul xizmati inspektori lavozimiga tayinlandi. Mustahkam intizom, sergaklik va halollik uning kundalik shioriga aylandi. Safdor Jasurjon Muhammadov xizmati davomida fuqarolar xavfsizligini taʼminlashni oʻzining muqaddas burchi deb bildi.
Qoidabuzarlarga nisbatan murosasiz boʻldi. Qisqa faoliyati davomida jamoada oʻz oʻrnini topdi, obroʻ-eʼtibor qozondi.
2025-yilning yanvar oyida Navoiy shahridagi Islom Karimov koʻchasida xizmat olib borayotgan vaqtda yoʻl qoidalarini qoʻpol ravishda buzib, boz ustiga davlat raqamisiz harakatlanib kelgan “KIA Sonet” avtomashinasini koʻrib qoldi. Unga toʻxtash ishorasini qildi. Ammo mashinani boshqarayotgan shaxs xodimning qonuniy talabiga boʻysunmay, uni urib yubordi. Ogʻir tan jarohati olgan Jasurjon Muhammadov shifoxonaga olib ketilayotgan paytda vafot etdi.
Tekshiruvlar jarayonida avtomashinani haydovchilik guvohnomasiga ega boʻlmagan, 2008-yilda tugʻilgan 10-sinf oʻquvchisi boshqargani, u yoʻl-transport hodisasini sodir etgandan soʻng jabrlanuvchiga yordam koʻrsatmasdan, voqea joyidan yashirinishga uringani aniqlandi.
Xizmat vazifasini bajarish chogʻida halok boʻlgan Jasurjon Muhammadovning fojiali oʻlimi nafaqat oila aʼzolari, balki barcha kasbdoshlari, uni yaqindan bilgan insonlarni larzaga soldi.
Bugun u oramizda yoʻq, ammo yorqin xotirasi qalblarda yashamoqda. Uning nomi — jasorat timsoli, hayoti esa burchga sadoqat namunasi boʻlib qoldi.
Vatan himoyachilari kuni arafasida Oʻzbekiston Respublikasi Prezidenti tomonidan imzolangan farmonga muvofiq, harbiy xizmatchilar va huquqni muhofaza qilish organlari xodimlaridan bir guruhi Vatanimizning yuksak mukofotlari bilan taqdirlandi.
Ular qatori marhum Jasurjon Muhammadov ham “Jasorat” medali bilan mukofotlandi.
©️ “Postda” gazetasi, Mahliyo Xolova, Navoiy viloyati.