Qaror va ijro. Uyi borning oʻyi yoʻq
2026-01-11 10:35:00 / Yangiliklar
Yangi Oʻzbekistonda oʻtgan 2025-yilda oʻz uyiga ega boʻlgan kishilarning kayfiyati, quvonchi boshqacha. Shunday xushkayfiyatdagi kishilar orasida davlatimizning ichki ishlar organlari xodimlariga boʻlgan eʼtibori va gʻamxoʻrligidan behad minnatdor boʻlgan xodimlar ham talaygina.
Samarqand shahar IIOFMB huzuridagi Tergov boʻlimi tergovchisi, kapitan Muhriddin Norpoʻlatov turmush oʻrtogʻi, Samarqand shahar IIOFMB 6-son IIB Kanselyariya katta ish yurituvchisi, safdor Nodirabegim Abdusalomovalar aynan shular sirasiga kiradi. Axir ular yillar davomida ijarada yashab, u uydan boshqasiga koʻchib sarsongarchilikda yashashar edi. 2025-yil bu oila uchun omadli yil boʻldi. Ular ham koʻpchilik hamkasblari qatori oʻz uyiga ega boʻlishdi.
Uy insonning xotirjamlik manbayi, shaxsiy istak va orzulari roʻyobga chiqadigan maskan. Shu bois, bunday quvonchli lahzalar kishiga nafaqat shodlik va shukronalik hadya qiladi, balki inson qalbida bir umrga muhrlanib qoladi.
- Ichki ishlar organlarida xizmat qilishning oʻziga xos mashaqqati bor. Navbatchilikda tunlar bedor oʻtadi. Bayram kunlari ham ishda boʻlamiz. Masʼuliyat doimo yelkamizda. Shu yillar davomida bir orzum bor edi. Farzandlarim emin-erkin, yayrab ulgʻayishlari uchun xotirjam yashaydigan maskanga ega boʻlsam degan. Oʻtgan yilda orzum haqiqatga aylandi, — deydi kapitan M.Norpoʻlatov.
Bu oilaning quvonchli lahzalari albatta. Vatanga sadoqatli xizmati va mashaqqatli mehnatlarining samarasi. Bir-birini qadrlab, oilaviy baxtni his qilib yashashining hosilasi. Har bir oilada oʻzaro bir-birini tushunish, bir maqsadga intilish boʻlsa, maqsadlar asta-sekin roʻyobga chiqaveradi.
- Insonning oʻz uyiga ega boʻlishi cheksiz baxt. Biz turmush oʻrtogʻim bilan bu baxtni kutib yashadik. Yangi uy baxt qoʻrgʻonimizga aylandi. Bolalarimiz yangi uyda, oʻz xonalarida shoʻx-shodon katta boʻlishadi. 2025-yilda ana shu orzumiz ushaldi. Ayniqsa, dastlabki toʻlovning foizi Ichki ishlar vazirligi tomonidan toʻlab berilganidan juda minnatdorman, — deydi safdor N. Abdusalomova.
Umida Mamadaliyeva, oʻz muxbirimiz, “Postda”
Samarqand viloyati