O‘zbеkiston Rеspublikаsi Ichki ishlаr vаzirligi

Yosh kelinchakning qahr-u gʻazab bilan dardini doston qilayotgan onasi qoʻshnisining «Qoʻying, qizingizga sovchi kelgan paytlarda hali yosh, bir-ikki yil kutishsin, deganimizga parvo qilmagan oʻzingiz-ku. Yaxshisi, qudangiz bilan murosa qiling. Farzandlar bebaxt boʻlib qolmasin» degan gaplariga quloq solgisi ham kelmasdi. Shukrki, keyinchalik koʻpni koʻrgan mahalla kayvonisi-yu xotin-qizlar faoli, rais-u profilaktika inspektori aralashib, oila asrab qolindi. Hozir qaynona maʼrakalarda kelinini ogʻzidan bol tomib maqtaydi...

Darhaqiqat, oilaviy ajralishlarning oldini olishda hamjihat-u hammaslahat ishlayotgan mahalla yettiligining oʻrni katta boʻlyapti. Qorakoʻl tumanidagi «Dargʻali» mahalla fuqarolar yigʻinida ham bu borada oʻrnak boʻlarli ishlar amalga oshirilyapti.

- Mahallamizda 1230 tadan ziyod oila boʻlsa, shularning salkam yarmi yosh oilalardir, — deydi profilaktika katta inspektori, mayor Abror Maqsudov. — Oilalarda hamjihatlikka erishish nafaqat endi turmush qurgan kelin-kuyovlar, balki xonadonda yashayotgan boshqa insonlarning munosabatiga ham bogʻliq. Biz profilaktik ishlarni olib borishda ana shu jihatga alohida eʼtibor beryapmiz.

Oʻtgan yil davomida 9 ta oilaviy mojaro oilani qoʻllab-quvvatlash va yarashtirish komissiyasida koʻrib chiqilib, ijobiy hal etildi. Ajrimlar boʻlmadi. Ayni paytda 3 ta nizoli oila bor. Ular bilan ham mahalla yettiligi doimiy ravishda uchrashib, muammolariga yechim topib kelishmoqda.

Mayor Abror Maqsudov huquqbuzarliklar va jinoyatchilikning har qanday koʻrinishiga qarshi murosasiz kurashadi. Maʼmuriy nazoratda turganlar, oila-turmush doirasida huquqbuzarliklar sodir etayotgan shaxslar, spirtli ichimlikka ruju qoʻyganlar, profilaktik hisobda turuvchi voyaga yetmaganlar bilan tushuntirish ishlarini olib borishdan tashqari, mahalla ahlining huquqiy savodxonligini oshirish, yoshlar bilan qonun ustuvorligi, kiberxavfsizlikka qarshi kurashishga bagʻishlab tadbirlar oʻtkazayotgani jinoyatchilikning oldini olishda asqatyapti.

- Mahallamizda yashovchi V.X. ismli shaxs ichkilikka ruju qoʻya boshladi. Har kech uyiga mast boʻlib kelar va janjal qilardi. Oxiri turmush oʻrtogʻi menga uchrashdi. Abrorjon bilan maslahatlashib, uni majburiy davolashga yubordik, — deydi mahalla raisi Murod Hamroyev.

Mahallada tinchlik va osoyishtalikni saqlash, fuqarolarning qonuniy manfaatlarini himoya qilishda lavhamiz qahramoni aynan mahalla fuqarolar yigʻini raisi, xotin-qizlar faoli, hokim yordamchisi va yoshlar yetakchisi bilan birgalikda, bamaslahat ishlagani bois katta yutuqlarni qoʻlga kiritmoqda.

- Mayor Abror Maqsudov jinoyatchilik va huquqbuzarliklarning barvaqt oldini olish, fuqarolar xavfsizligini taʼminlash borasidagi ijobiy natijalari bilan boshqa hamkasblariga oʻrnak boʻlib kelmoqda, — deydi tuman IIB boshligʻi oʻrinbosari, mayor Erkin Qobilov.

Lavhamiz qahramoni ichki ishlar organlaridagi ilk faoliyatini 2013-yili Qorovulbozor tumani IIB huzuridagi Qoʻriqlash xizmatida boshlagan edi. Oradan toʻrt yil oʻtib, uni Qorakoʻl tumani IIB profilaktika xizmatiga oʻtkazishdi. U tumandagi «Yangi turmush», «Qozon», «Alikaxoʻja» mahalla fuqarolar yigʻinida faoliyat yuritdi. Albatta, bu davrda yosh xodim izlanuvchanligi, kasbiy va jismoniy mahoratini oshirib borishi hamda namunali xizmati bilan rahbariyat nazariga tushgan edi. Mana, uch yildirki, u «Dargʻali» mahallasida samarali faoliyat olib bormoqda.

Mayor A. Maqsudov shogirdi, katta leytenant Sherzod Usmonov bilan xizmat olib borayotgan «Shakarbek» mahallasida yashovchi Oʻ. Xurshidaning hovlisida taqiqlangan 129 tup koʻknor oʻsimligini parvarish qilib kelayotganini hamda 140 gramm quritilgan koʻknor oʻsimligi borligini aniqladi. Shuningdek, u muqaddam bir necha marotaba oʻgʻrilik jinoyatini sodir qilgan Q. Otaxonni Buxoro shahrida yashirinib yurgan manzilini aniqlab, uni ushlab keladi. Soʻng 4-sonli IIB tergov hibsxonasiga joylashtiradi.

Bir soʻz bilan aytganda, mayor A. Maqsudov el-tashvishini oʻylab, mahalla faollari bilan hamjihatlikda hududdagi osoyishtalikni taʼminlash

yoʻlida fidoyilik koʻrsatib xizmat qilmoqda. Uning xizmatidan esa aholi minnatdor.

Mirzoqul Ahadov, oʻz muxbirimiz. “Postda”
Buxoro viloyati