Vatan meni ulgʻaytirgan
2026-01-05 10:50:00 / Yangiliklar
Fargʻona shahar IIB Tergov boʻlimi katta surishtiruvchisi, kapitan Umidjon Sayfutdinovga 2025-yil juda omadli keldi. Oilasida ham, ish joyida ham koʻplab quvonchli voqealar yuz berdi. Eng muhimi, oʻz uyiga, yaʼni, kichik vataniga ega boʻldi.
Fargʻona shahrining Moziy koʻchasidagi yangi qurilgan koʻp qavatli uydan 2 xonali xonadonni imtiyozli kredit asosida sotib olib, yaqinda yangi uyga koʻchib oʻtdi.
Shahar Ichki ishlar boshqarmasi maʼmuriy binosining yonginasida joylashgan ushbu koʻp qavatli uydan Umidjon bilan birga yana 47 nafar ichki ishlar organlari xodimlari oʻz xonadonlariga ega boʻlishgan.
— Barcha hamkasblar bir joyda yashash juda zavqli boʻlarkan, — deydi kapitan U. Sayfutdinov. — Qoʻni-qoʻshnichilik rishtalarini oʻrnatib, ahil-inoq, bir-birimizga suyanch va dalda boʻlib yashayapmiz. Eng eʼtiborlisi, uyimizning derazasidan ishxonamiz shundoqqina koʻrinib turadi. Ishga kech qolish, uyga kech qaytish, degan noqulayliklar umuman yoʻq. Tushlikda ham oilamdan xabar olib turaman. Bundan ortiq sharoit, bundan ortiq baxt boʻladimi insonga. Ishlagan sari, ishlaging keladi.
Umidjon Beshariq tumanining Soylabi qishlogʻida tugʻilib kamolga yetgan. 2018-yilda IIV Akademiyasini tamomlab, sohada ish boshlagan. Hozirda 2 nafar farzandi bor. Turmush oʻrtogʻi bilan yangi uyda xotirjam hayot kechirishmoqda. Yangi uyga koʻchib oʻtgach, Beshariqda yashaydigan otasi Kamoldin Xolmatov, onasi Gulbahorxon Turonovalarning ham koʻngli xotirjam boʻldi. Avvallari, farzandlari ijara uyda yashaganida, mehmonga kelgani xijolat tortishardi. Endi esa nabiralarini koʻrgani bemalol kelib-ketishmoqda.
— 2025-yildan juda minnatdorman, — deydi lavhamiz qahramoni. — Yangi yilda ham orzularim juda koʻp. Eng oliy maqsadim esa ana shunday imkoniyat va sharoitlar yaratib berayotgan Ona vatanimga, tanlagan kasbimga sadoqat bilan xizmat qilish, ota-onam va ustozlarimning ishonchini oqlash.
Darvoqe, Umidjon Sayfutdinovda ikkinchi isteʼdodi ham bor. Bolaligidan adabiyotga mehr qoʻyib, sheʼrlar yozib turadi. Vatanparvarlik va ichki ishlar organlari xodimlari haqida yozgan bir qator ijodiy ishlari gazeta-jurnallarda eʼlon qilingan. 2018-yilda «Onajonim» nomli sheʼriy toʻplami ham nashr etilgan.
— Vatan haqida quyidagi yangi misralarni qogʻozga tushirayotgandim, — deya hali siyohi qurimagan sheʼridan oʻqib berdi:
Vatan meni ulgʻaytirgan, Sharafim ham shonimsan.
Koʻzimning oq-u qorasi, Koʻksimdagi jonimsan.
Bobolarim yotgan tuproq, Ona yer — makonimsan.
Dunyo ichra eng ulugʻim, Hur Oʻzbekistonimsan.
Abduvosit Sidiqov, oʻz muxbirimiz. “Postda”
Fargʻona viloyati