Xalq bilan muloqot: Buxoro shahrida navbatdagi sayyor qabul oʻtkazildi
2025-12-24 11:40:00 / Yangiliklar
Bugun, Buxoro viloyati hokimi Botir Zaripov boshchiligida Buxoro shahridagi Kasbiy koʻnikmalar markazida navbatdagi sayyor qabul oʻtkazildi. Qabulda viloyat Ichki ishlar boshqarmasi boshligʻi hamda viloyatdagi mutasaddi idoralar rahbarlari ishtirok etdilar.
Uchrashuv davomida fuqarolardan kelib tushgan murojaatlar sogʻligʻini tiklashga amaliy yordam koʻrsatish, moddiy koʻmak, tadbirkorlikni rivojlantirish, kredit va subsidiya masalalari, ishga joylashish, uy-joy, kadastr, qurilish hamda huquq sohalariga oid masalalarni oʻz ichiga oldi.
Joyning oʻzida hal etish imkoniyati mavjud murojaatlar boʻyicha ijobiy yechimlar topildi. Ayrim murojaatchilarga huquqiy tushuntirishlar berildi. Qoʻshimcha oʻrganishni talab etgan murojaatlar esa mutasaddi tashkilot rahbarlariga aniq muddatlar belgilangan holda topshiriq sifatida yuklatilib, ijrosi qatʼiy nazoratga olindi.
Shuningdek, viloyat Ichki ishlar boshqarmasi boshligʻi tomonidan jamoat xavfsizligi, profilaktika, jinoyatchilikka qarshi kurashish, sud-huquq hamda tergov-surishtiruv masalalariga oid oʻnga yaqin murojaatlarga alohida eʼtibor qaratildi.
Bunday sayyor qabullar xalq bilan muloqotni yanada mustahkamlash, fuqarolar ishonchini oshirish va muammolarni joyida hal etish orqali amaliy natijalarga erishishda muhim ahamiyat kasb etmoqda.
Buxoro viloyati IIB Axborot xizmati